Bu forum Şimali Kipr üçün strateji əhəmiyyət daşıyır - Universitet təmsilçisi

Türk Dövlətləri Təşkilatı (TDT) çərçivəsində Bakıda keçirilən 7. Media Forumu, türk dünyasının media əməkdaşlığını gücləndirməsi baxımından mühüm bir platforma kimi dəyərləndirilir.

Modern.az xəbər verir ki, forumda iştirak edən Kipr Amerikan Universiteti (KAU) beynəlxalq əlaqələr təmsilçisi Dr. Emel Yılmaz tədbirin Şimali Kipr Türk Respublikası üçün stratejik əhəmiyyətinə diqqət çəkib.

Dr. Emel Yılmaz çıxışında, TDT mediasının bir araya gəlməsinin həm informasiya mübadiləsini gücləndirdiyini, həm də türk dünyasının ortaq maraqlarının müdafiəsində güclü bir sinerji yaratdığını vurğulayıb. Onun sözlərinə görə, ŞKTR-nın bu platformalarda təmsil olunması, həm siyasi görünürlük, həm də beynəlxalq aləmdə haqq səsinin duyurulması baxımından xüsusi önəm daşıyır.

“ŞKTR-nın TDT ailəsi içindəolması və bu tip forumlarda söz sahibi olması, həm Türk dünyası ilə inteqrasiyasını gücləndirir, həm də Kipr məsələsində informativ dayanışmanı artırır”. – deyə Dr. Yılmaz bildirib.

Forum çərçivəsində media təmsilçiləri arasında keçirilən fikir mübadiləsinin, gələcəkdə daha koordinasiyalı bir informasiya siyasətinin qurulmasına töhfə verəcəyini qeyd edən Dr. Emel Yılmaz, Kipr Amerikan Universitetinin də bu istiqamətdə akademik və institusional dəstək verməyə hazır olduğunu söyləyib.

Universitet təmsilçisi xüsusilə dezinformasiya ilə mübarizənin gündəmdə olduğu bir dövrdə, TDT media qurumları arasında əməkdaşlığın gücləndirilməsinin həm ŞKTR, həm də bütün türk dövlətləri üçün həyati əhəmiyyət daşıdığını qeyd edib.

Qeyd edək ki, forumda müxtəlif ölkələrdən gələn media rəhbərləri, jurnalistlər və akademiklər, informasiya təhlükəsizliyi, media etikası və ortaq xəbər mənbələrinin gücləndirilməsi kimi mövzular ətrafında geniş müzakirələr aparıblar.