"356 min məzuna diplom elektron formatda verilib"

"Təhsil sahəsində süni intellekt platformalarından istifadə imkanlarının genişləndirilməsi də planlaşdırılır".

Tehsilmedia.com xəbər verir ki, bu sözləri elm və təhsil naziri Emin Əmrullayev mətbuat konfransında çıxışı zamanı deyib.


Nazir bildirib ki, bu il 44 mindən artıq təhsilverənə müxtəlif süni intellekt platformalarından istifadə hüququnun və imkanlarının verilməsi planlaşdırılır.


Emin Əmrullayev yeni tədris ilində tətbiq olunan mühüm dəyişikliklərdən birinin də attestat və diplomların elektron formada təqdim edilməsi olduğunu diqqətə çatdırıb.


Onun sözlərinə görə, bu il 356 mindən çox məzun attestat və diplomunu ilk dəfə “myGov” platforması vasitəsilə elektron formada əldə edib.


“Bu proses çox uğurla tamamlanıb. Artıq kağız diplomlar yox, məhz elektron formatda attestatlar və diplomlar təqdim edilir. Bu, bizə iki məsələdə kömək edir.

Birincisi, prosesi sürətli şəkildə tənzimləməyə, o cümlədən prosesdə şəffaflığı artırmağa imkan verir. Çünki faktiki olaraq sənədlər insanların öz FİN nömrələrini daxil etməklə “myGov” platformasında əldə edə biləcəyi formadadır. Yəni gedib kimdənsə öz attestatını, öz diplomunu götürməyə ehtiyac yoxdur”, – nazir deyib.

Emin Əmrullayev bildirib ki, elektron sənədlərin tətbiqi, eyni zamanda, onların dürüstlüyünün və düzgünlüyünün təmin edilməsinə, saxta sənədlərin gələcəkdə qarşısının alınmasına da kömək edir.