Bakıda İnklüziv Təlim və Tədris Mərkəzinin açılışı olub
Peşə Təhsili üzrə Dövlət Agentliyinin tərəfdaşlığı, SOCAR Midstream Gas Operations və Cənubi Qafqaz Boru Kəməri üzrə tərəfdaşlarının maliyyə dəstəyi, “Birgə və Sağlam” İctimai Birliyinin icraçılığı ilə həyata keçirilən “SkillBridge – İnklüziv məşğulluq üçün İnklüziv təhsil” layihəsi çərçivəsində Mədəniyyət və Sənətkarlıq üzrə Bakı Dövlət Peşə Təhsili Mərkəzində İnklüziv Təlim və Tədris Mərkəzi yaradılıb.
Tehsilmedia.org xəbər verir ki, mərkəzin açılış mərasimində Alyona Əliyeva, həmçinin dövlət qurumlarının, layihə tərəfdaşlarının, təhsil və ictimai təşkilatların nümayəndələri iştirak ediblər.
Bildirilib ki, yeni mərkəzin yaradılmasında əsas məqsəd sağlamlıq imkanları məhdud, əlillik və neyromüxtəlifliyi olan şəxslərin peşə bacarıqlarının inkişafına, onların əmək bazarına inteqrasiyasına və dayanıqlı məşğulluq imkanlarının genişləndirilməsinə dəstək göstərməkdir.
Layihə çərçivəsində mərkəzdə dörd emalatxana avadanlıqlarla təchiz edilib və inklüziv təhsil mühitinin formalaşdırılması istiqamətində tədris infrastrukturunun təkmilləşdirilməsinə dair işlər görülüb.
Mərkəzdə “qrafik dizayn”, “veb dizayn və proqram təminatı”, “interyer və eksteryerin bədii tərtibatı”, “ağac nəqqaşlığı”, eləcə də “qida və qeyri-qida mallarının satıcısı, nəzarətçi-xəzinədar” ixtisasları üzrə təlimlərin təşkili nəzərdə tutulur. Bununla yanaşı, “Birgə və Sağlam” İctimai Birliyinin nəzdində avadanlıqlarla təchiz edilmiş 1 emalatxanada neyromüxtəlifliyi olan gənclər üçün “qənnadçı-şirniyyatçı”, “barista” və “kargüzarlıq” peşə istiqamətləri üzrə praktik əsaslı təlimlər təşkil olunur.
“SkillBridge” layihəsi çərçivəsində ümumilikdə 200 nəfərin qiymətləndirilməsi, 100 nəfərin təlim proqramlarına cəlb olunması və ən azı 60 nəfərin məşğulluğunun təmin edilməsi hədəflənir. Eyni zamanda, iş mühitində dəstək mexanizmlərinin inkişaf etdirilməsi və inklüziv məşğulluqla bağlı ictimai məlumatlılığın artırılması istiqamətində tədbirlər həyata keçiriləcək.
“Azərbaycan 2030: sosial-iqtisadi inkişafa dair Milli Prioritetlər” dinamik, inklüziv və sosial ədalətə əsaslanan cəmiyyətin formalaşmasını, təhsil imkanlarının əlçatanlığının artırılmasını və hər bir şəxsin bacarıqlarına uyğun peşə əldə edərək məşğulluğunun təmin edilməsini prioritet istiqamət kimi hədəfləyir.
Açılış mərasimində çıxış edən Elm və təhsil nazirinin muavini Firudin Qurbanov bildirib ki, bütün uşaqların təhsil alması üçün imkan yaradılmalıdır. İnklüziv təhsil sahəsində fiziki məhdudiyyətlər aradan qaldırılmalı, müvafiq şərait yaradılmalıdır: "Əsas məsələ diplom almaq deyil, məzunların inklüziv əmək bazarında iştirakına və işlə təmin olunmasına imkan yaratmaqdır".
SOCAR Midstream Gas Operations MMC-nin icraçı direktoru Polad Rüstəmov bildirib ki, məqsəd yalnız bir məkanın açılması deyil, yeni imkanların yaradılmasıdır.
O qeyd edib ki, inklüzivlik, ilk növbədə, insanlar üçün bərabər imkanların yaradılması deməkdir: "Bu, həmin istiqamətdə ilk addımdır. İnklüziv təhsil və inklüziv məşğulluq bir-birindən ayrı düşünülə bilməz".
Onun sözlərinə görə, bu təşəbbüs gənclərin özünəinamının artırılmasına və potensiallarının reallaşdırılmasına xidmət edir. Fərqli imkanlara malik şəxslərin təhsil alması, bacarıqlar qazanması və əmək bazarına inteqrasiyası üçün şərait yaradılmalıdır.
Sonda qonaqlar Mədəniyyət və Sənətkarlıq üzrə Bakı Dövlət Peşə Təhsili Mərkəzində İnklüziv Təlim və Tədris Mərkəzi ilə tanış olublar.
Qeyd edək ki, “SkillBridge” layihəsi peşə təhsili ilə məşğulluq arasında keçidin gücləndirilməsinə, sosial inklüzivliyin təşviqinə və bərabər imkanlara əsaslanan əmək bazarının inkişafına töhfə verir.
