Məktəblilərin dostu, yoxsa direktorun nəzarətçisi?

"Bir vaxtlar məktəblərdə bunlara “Məktəblilərin dostu” deyirdilər. Görünür, bu ad özünü doğrultmadı. Ad dəyişdi, indi “şagirdlərin təhlükəsizliyinin təmin olunmasına cavabdeh” oldular.

Amma məktəblərdə müşahidə etdiyimiz mənzərə adamı tamam başqa düşüncələrə aparır.

Dünən direktorla əvvəlcədən danışmışam, məktəbə gələcəyimi bilir. Məktəbə daxil oluram, qarşıma bu şəxslərdən biri çıxır:
— Kimin yanına gəlmisiniz?
— Direktorun.
— Valideynsiniz?
— Xeyr.
— Bəs kimsiniz?
— Direktor məni gözləyir.
— Nə ilə bağlı gəlmisiniz?
İndi sual yaranır: şagirdin təhlükəsizliyini qoruyan əməkdaşın əsas işi direktorun yanına kimin gəldiyini, həmin şəxsin kim olduğunu və direktorla nə danışacağını öyrənməkdir?
Əgər belədirsə, onda burada söhbət artıq yalnız şagird təhlükəsizliyindən getmir.
Çünki bu davranış məktəbin girişində təhlükəsizlik təmin etməkdən çox, direktorun fəaliyyətini, görüşlərini və məktəbə gələn şəxsləri müşahidə edən bir nəzarət mexanizmi təsiri yaradır.
Bəs bu məlumatlar hara gedir? Kimə çatdırılır? Kim hesabat alır? Və ən əsası, direktorun yanına gələn jurnalistin kim olduğunu və nə üçün gəldiyini öyrənmək bu şəxslərin vəzifə təlimatının hansı bəndində yazılıb?

Bir də unutmayaq: bunlar dövlət büdcəsindən əməkhaqqı alan şəxslərdir. Deməli, cəmiyyətin haqqı var bilsin — məktəblərdə bu strukturun real funksiyası nədir?
Şagirdin təhlükəsizliyini qorumaq, yoxsa məktəbdə kimin nə etdiyini izləyib yuxarıya məlumat ötürmək? Əgər ikinci funksiyadırsa, bunu təhlükəsizlik adı ilə pərdələməyin nə mənası var?
Məktəb direktorun iş otağıdır, nəzarət məntəqəsi deyil."