Fənnini bilmək kifayət deyil - Müəllimlərin rəqəmsal savadı da ölçülməlidir

Sabiq maliyyə naziri, professor Saleh Məmmədov müəllimlərin kompüter bacarıqları ilə bağlı fikirlər səsləndirib.

O bildirib ki, kompüterdən istifadə etməyi bacarmayan müəllim məktəbə buraxılmamalıdır.

Maraqlıdır ki, müasir dövrdə rəqəmsal savadlılığın müəllimlər üçün məcburi şərtə çevrilməsi təhsilin keyfiyyətinə necə təsir göstərər?

Tehsilmedia.org xəbər verir ki, azedu.az-a mövzu ilə bağlı açıqlama verən təhsil məsələləri üzrə ekspert Vüsət Əzizov qeyd edib ki, müəyyən yaş qrupunda olan və uzun illər məktəbdə çalışan müəllimlərdən bu bacarıqları birdən-birə tələb edib “bacarmırsansa, məktəbə buraxılmırsan” demək də doğru olmaz:



"Bu fikirlə müəyyən mənada razılaşmaq olar, amma məsələni “kompüter bilməyən müəllim məktəbə buraxılmamalıdır” formasında sərt qoymaq düzgün yanaşma deyil. Müasir müəllim üçün rəqəmsal savadlılıq artıq əlavə üstünlük yox, peşəkar fəaliyyətin vacib komponentlərindən biridir. Elektron jurnal, rəqəmsal tədris resursları, təqdimatlar, onlayn platformalar, süni intellekt alətləri və müxtəlif elektron xidmətlər müəllimin gündəlik fəaliyyətinin bir hissəsinə çevrilib. Bu baxımdan, kompüterdən ümumiyyətlə istifadə edə bilməyən müəllimin müasir məktəb mühitində effektiv fəaliyyət göstərməsi ciddi çətinlik yarada bilər.

Amma burada “kompüter bilməmək” anlayışının özü də dəqiqləşdirilməlidir. Müəllimdən proqramçı səviyyəsində texniki bilik tələb olunmur. Əsas tələb onun tədris prosesində zəruri olan rəqəmsal bacarıqlara sahib olmasıdır. Məsələn, elektron sistemlərdən istifadə etmək, sənədlər hazırlamaq, məlumat axtarmaq, təqdimatlar yaratmaq, onlayn resurslardan düzgün yararlanmaq və rəqəmsal təhlükəsizlik qaydalarını bilmək.

Digər tərəfdən, müəyyən yaş qrupuna aid olan və uzun illər məktəbdə çalışan müəllimlərdən bu bacarıqları birdən-birə tələb edib “bacarmırsansa, məktəbə buraxılmırsan” demək də doğru olmaz. Əvvəlcə onların sistemli şəkildə təlimlərə cəlb edilməsi, sertifikasiya və ya attestasiya prosesində rəqəmsal bacarıqlarının qiymətləndirilməsi daha sağlam yanaşmadır.

Gələcəkdə müəllimin peşəkar standartlarında rəqəmsal savadlılıq ayrıca və ölçülə bilən tələb kimi müəyyənləşdirilməlidir. Müəllim yalnız fənnini yaxşı bilməklə kifayətlənməməli, həmin bilikləri müasir texnologiyaların imkanlarından istifadə etməklə şagirdlərə çatdırmağı da bacarmalıdır".