Bağçadan başlayan dəyişiklik: Təhsilin ən vacib mərhələsinə yeni baxış

"Bəzən təhsildə böyük dəyişiklikləri yalnız məktəbin qapısında axtarırıq. Halbuki uşağın təhsillə ilk ciddi görüşü məktəbdə yox, məktəbəqədər mərhələdə başlayır.

Dünən keçirilən “Məktəbəqədər təhsil: keyfiyyətli başlanğıc, dayanıqlı inkişaf” konfransında diqqətimi çəkən əsas məqam da məhz bu oldu: söhbət sadəcə bağçadan deyil, uşağın gələcək təhsil yolunun təməlindən gedirdi.

Faktlara baxaq:

Yeni tədris ilində dövlət məktəbəqədər təhsil müəssisələrində yerlərin sayı artırılıb, icma əsaslı qruplara daha çox uşaq cəlb olunub. Nazirliyin açıqlamasına görə, məktəbəqədər təhsilin əhatə dairəsinin genişləndirilməsi üçün yeni maliyyələşmə mexanizmi və valideyn–dövlət–özəl əməkdaşlığı da tətbiq olunur. Bu, sadəcə rəqəm deyil. Bir uşağın bağçaya qəbul olunması bir ailənin yükünün azalması, uşağın sosiallaşması və məktəbə daha hazırlıqlı başlaması deməkdir.

Daha bir vacib məsələ isə tərbiyəçi-müəllimdir. Çünki yaxşı bina, yaxşı proqram, yaxşı maliyyələşmə hələ nəticənin özü deyil. Nəticəni uşağın qarşısında dayanan müəllim yaradır. Konfransda da müəllimlərin peşəkar inkişafının dəstəklənməsi və onların müasir pedaqoji yanaşmaları, gündəlik fəaliyyətə tətbiq etməsinin vacibliyi xüsusi vurğulanıb.

Mən təhsil sahəsində nöqsanları yazanda heç vaxt “hamısı pisdir” deməmişəm. Əksinə, yaxşı görülən iş varsa, onu da yazmaq jurnalistin borcudur.
Bu baxımdan Emin Əmrullayevin rəhbərlik etdiyi Elm və Təhsil Nazirliyinin məktəbəqədər təhsili ayrıca gündəmə çıxarması və məsələyə yalnız “uşağı bağçaya yerləşdirmək” kimi yox, keyfiyyət, müəllim, mühit və gələcək nəticə baxımından yanaşması müsbət addımdır. Əlbəttə, konfrans keçirmək hələ nəticə demək deyil. Əsl nəticə bağçadakı uşağın inkişafında, müəllimin peşəkarlığında, valideynin razılığında və illər sonra həmin uşağın məktəbdə göstərəcəyi nəticədə görünəcək.

Amma bir həqiqəti də etiraf etmək lazımdır: Təhsildə dəyişiklik istəyiriksə, onun başlanğıc nöqtəsini düzgün seçməliyik. Bu başlanğıc isə çox vaxt məktəbin qapısından əvvəl başlayır.

Dünənki konfransın mənə görə ən mühüm mesajı da məhz budur: uşağın gələcəyinə qoyulan sərmayə onun məktəbə getdiyi gün yox, daha əvvəl başlayır."