“1 nəfərə 18 saat dərs vermək ən məntiqli qərardır” - Elçin Əfəndi

"Çox qəribə təzadla üz-üzə qalmışıq. Gəlir ki, mənə dərs saatını az verin. İzah olunur ki, vakansiyaya çıxarılan dərs saatına əsasən, 1 müəllimə ehtiyac var. Əgər sizə mövcud dərs saatının bir hissəsini verəriksə, o zaman alternativ vakansiya elan etməliyik ki, bu da az dərs saatı olduğu üçün tutulmur. Nəticədə şagirdlərin təhsil almaq hüququ pozulur, tədris prosesi pozulur və s. Siz də bir müddət sonra verilən dərs saatına görə şikayət edirsiniz ki, əmək haqqı azdır".

Tehsilmedia.org xəbər verir ki, bunu elm və təhsil məsələləri üzrə mütəxəssis Elçin Əfəndi feysbuk hesabında yazıb.

"Son dövrlər təəssüf ki, bu tendensiya davam edir. Bir əldə iki qarpız tutmağa cəhd edənlərin sayı hər il artır. Buna bir əncam çəkilməlidir. Ya məktəb, ya evin, ya icarəyə götürdüyün obyekt, ya da çalışdığın özəl təhsil müəssisəsi. 4 saat, 6 saat dərs istəməklə öz mənafeyini düşünmək, uşaqların təhsil hüququnu görməzdən gəlmək, digər həmkarının az qazancına rəvac verəcək qərar almaq nə etikdir, nə də pedaqoqa yaraşan hal. Əgər dövlət təhsil müəssisəsindəki gəlirin azdırsa və şəxsi təhsil xidmətindən daha çox gəlir əldə edirsənsə, o zaman öz fəaliyyətini davam etdir və dövlət təhsil müəssisəsindəki yerin ona ehtiyacı olan şəxsə təqdim olunsun. Kiminsə özünə məxsus fəaliyyətinə məhdudiyyət tətbiq olunmur.

Fikrimcə, 3 nəfərin hər birinin istəyinə görə 6 saat dərs verməkdənsə, 1 nəfərə 18 saat dərs vermək ən məntiqli və doğru qərardır".