Ulu öndər Heydər Əliyevin 100-cü ildönümü münasibətilə “Əbədiyyətə doğan günəş” adlı tədbir keçirilib-FOTO-VİDEO

tehsilmedia.info xəbər verir ki, şəhidlərin əziz xatirəsinin yad edilməsi ilə başlanılan tədbirdə dövlət himni səsləndirilib. Tədbirdə Abşeron rayon icra hakimiyyətinin başçısı Abdin Fərzəliyev, Abşeron-Xızı regional təhsil idarəsinin müdiri İlhamə Abdullayeva və idarənin tabeliyinə daxil olan təhsil müəssisələrinin nümayəndələri, şəhid ailələri və qazilər iştirak edib. Açılış nitqi ilə çıxış edən Abşeron rayon icra hakimiyyətinin başçısı Abdin Fərzəliyev bildirib ki, ulu öndərin irsinin yaşadılması və şagirdlərə təbliği istiqamətində Heydər Əliyevin 100 illiyinə həsr olunmuş silsilə tədbirlərin əhəmiyyəti çox böyükdür. Abşeron rayon icra hakimiyyətinin başçısı Abdin Fərzəliyev qeyd edib ki, Heydər Əliyev həyatı boyu xalqının inkişafı və tərəqqisi üçün çalışmış və xalqına daima dəstək olmuş dahi şəxsiyyətdir. İcra başçısının sözlərinə görə, Heydər Əliyevin inkişaf istiqamətlərində təhsil strategiyası əsas prioritetlərdən biri idi. Heydər Əliyevin zəngin təcrübəsi və siyasi əqidəsi nəticəsində yalnız elm və təhsil deyil, bütün sahələr öz intibah dövrünü yaşadı. Ulu öndər, dahi şəxsiyyət Heydər Əliyev respublikaya rəhbər təyin olunan ilk gündən bu sahənin inkişafını əsas məsələ kimi diqqətdə saxlamışdır.

Abşeron-Xızı regional təhsil idarəsinin müdiri İlhamə Abdullayeva Heydər Əliyevin elm və təhsilin inkişafındakı misilsiz xidmətlərindən bəhs edib. Bildirilib ki, Azərbaycan təhsilinin tariximizdə yüksəlişi, əsl intibah illəri kimi daxil olan ilk mərhələsi Heydər Əliyevin Azərbaycana rəhbərliyinin I dövrünə təsadüf edir.

İlhamə Abdullayeva qeyd edib ki, təhsilin xalqın inkişafında rolunu və cəmiyyətin formalaşmasında əhəmiyyətini daim yüksək qiymətləndirən ulu öndərin qəbul etdiyi qərarlar, irəli sürdüyü fikirlər bu gün də təhsil istiqamətində görülən işlərə öz töhfəsini verməkdədir.

Sonra tədbir əbədi-bədii kompozisiya ilə davam edib.