Şərqşünaslıq İnstitutunda “Heydər Əliyev və azərbaycançılıq ideyası” mövzusunda elmi sessiya keçirilib - FOTO
Dekabrın 11-də AMEA-nın akad. Z.M.Bünyadov adına Şərqşünaslıq İnstitutunda “Heydər Əliyev və azərbaycançılıq ideyası” mövzusunda elmi sessiya keçirilib.
Bu barədə "tehsilmedia.info" a institutdan məlumat verilib.
Tədbirin əvvəlində Ulu Öndər Heydər Əliyevin və Azərbaycanın ərazi bütövlüyü uğrunda canlarından keçən şəhidlərimizin xatirəsi bir dəqiqəlik sükutla yad edilib.
Elmi sessiyanı giriş sözü ilə açan AMEA-nın vitse-prezidenti v.i.e., Şərqşünaslıq İnstitutunun direktoru akademik Gövhər Baxşəliyeva bildirib ki, müasir dünyada təzahür edən və böyük rola malik ideoloji cərəyanlardan biri milli ideologiyadır. Ölkəmizdə əsası Ümummilli Lider Heydər Əliyev tərəfindən qoyulmuş azərbaycançılıq ideologiyasının formalaşması dövlətçiliyimiz və xalqımızın inkişafında mühüm rol oynayıb, milli özünüdərkin və milli ruhun dirçəlməsinə səbəb olub.
Ulu Öndərin müəllifi olduğu azərbaycançılıq ideologiyasının Azərbaycanda yaşayan, onu vətən bilən bütün fərdləri birləşdirən ideologiya olduğunu deyən akademik G.Baxşəliyeva milli məfkurə olan azərbaycançılığın dahi şəxsiyyətin Azərbaycan cəmiyyətinə təqdim etdiyi universal dəyərlər sistemi olduğunu, eyni zamanda Azərbaycan cəmiyyətinin bütün təbəqələrində qəbul edilən, mənimsənilən və həyat tərzinə çevrilən bir ideoloji xətt olduğunu vurğulayıb.
Şərqşünaslıq İnstitutunun Cənubi Azərbaycan şöbəsinin aparıcı elmi işçisi tarix üzrə fəlsəfə doktoru, dosent Yeganə Hacıyeva elmi sessiyada “Heydər Əliyevin azərbaycançılıq siyasəti və bütöv Azərbaycan” mövzusunda məruzə edib. Məruzədə Heydər Əliyevin həm SSRİ, həm də müstəqillik dövründə Azərbaycan xalqının mədəni-mənəvi birliyi istiqamətində fəaliyyətindən bəhs edilib. Ulu Öndərin Cənubi Azərbaycandakı soydaşlarımızın hüquqlarının qorunması, vətənin birləşdirilməsi, bütövləşdirilməsi məsələsini müxtəlif çalarlarda gündəmə gətirməklə hər iki tayda yaşayan azərbaycanlıların şüurunda və fəaliyyətində cənub mövzusunun müəyyən yer tutmasında mühüm rol oynadığını deyən məruzəçi Heydər Əliyevin davamlı fəaliyyətinin nəticəsi olaraq “Cənubi Azərbaycan” adının elmi-siyasi məfhum kimi rəsmiləşdirildiyini, “Bütöv Azərbaycan” şüarının təkcə ədəbi, ictimai mühitdə deyil, eyni zamanda siyasi dairələrdə geniş müzakirə obyektinə çevrildiyini bildirib.
Şərqşünaslıq İnstitutunun İran filologiyası şöbəsinin müdiri filologiya üzrə fəlsəfə doktoru, dosent Günay Verdiyeva “Ulu Öndər və Cavad Heyət” mövzusunda məruzə edib. Məruzədə Ulu Öndər Heydər Əliyevlə dünya şöhrətli alim, naşir, həkim Cavad Heyət arasında olan münasibətdən bəhs olunub. Ümummilli Liderin bütün həyatı boyu canı və qanı ilə vətənə bağlı insan kimi “Cənubi Azərbaycandan olan ədiblərlə sıx əlaqədə olduğunu, onların taleləri ilə yaxından maraqlandığını deyən G.Verdiyeva bu ədiblərin sırasında Cavad Heyətin də olduğunu vurğulayıb. Məruzəçi Cavad Heyətin də öz növbəsində Ulu Öndərə böyük rəğbət bəslədiyini, hər zaman Heydər Əliyevin vətənə və Azərbaycan dilinə olan sevgisini heyranlıqla bildirdiyini qeyd edib.
Sonda məruzələr ətrafında müzakirələr aparılıb, suallar cavablandırılıb.
