Müəllimlərin "Fərdi Repetitor" zorakılığı
Məktəblərdə ən çox qarşılaşılan və ən ciddi problemlərdən biri, müəllimin bütün şagirdləri hazırlığa gəlməyə məcbur etməsidir. Birinci sinfə başlayandan bütün şagirdlər hazırlığa getməyə başlayırlar. Bu tamamilə biabırçılıqdır. Üstəlik müəllim şagirdləri vadar edir ki, məhz onun yanına gəlsin. Məktəbdə keçdiyi dərsi bir də evdə keçsin. Ya da elə dərsdən sonra məktəbdə qalıb əlavə məşğul olsun.
Üstəlik elə bir şərait yaradır ki, başqa müəllimin yanına və ya hansısa kursa gedəndə şagirdi "düşmən" elan edir. Valideyni hədələməyə, uşağın qiymətin aşağı salmağa başlayır. Söz atmalar, sataşmalar, şagirdə mənfi münasibət göstərir.
Müəllimin müəllim şəxsiyyətinə yaraşmayacaq və etik davranış qaydalarını pozacaq hallara yol verdiyi təqdirdə nə işdən uzaqlaşdırılmır, nə də işdən azad edilmir. Niyə? Niyə bu qaydalara riayət edilmir?
1. Müəllim hansı haqla şagirdləri öz yanına hazırlığa gəlməyə məcbur edə bilər?
2. Müəllim hansı haqla başqa müəllimə və ya kursa gedən şagirdə qarşı mənfi münasibət göstərməlidir?
3. Niyə valideyn-müəllim, müəllim-şagird və şagird - şagird münasibətləri pozulmalıdır?
4. Ən əsası niyə hamı hazırlığa gedir?
Əgər fənn müəllimi 45 dəqiqədə dərsi izah edə bilmirsə, 1 saatlıq hazırlıqda qeyri-adi nə olacaq? Müəllimin peşəkarlığı yoxdur ki, izah edə bilmir. Həmin peşəkar olmayan müəllim 45 dəqiqədən əlavə verilən 15 dəqiqədə xariqüladələr yaradacaqsa, razıyıq uşaqlar tənəffüsə çıxmasın, amma hazırlığa da getməsin.
Məktəbdə təhsil və dərsliklər ödənişsizdir deyə bizim konstitusiya qanunlarımız olduğu halda, təhsilə heç nədən bu qədər pul ödənilməsi səbəbi nədir?
Şagirdlərdə hansısa fəndən zəiflik varsa, vaxtında müəyyənləşdirilməli və müəllim-şagird-valideyn münasibətini əsas götürməklə şagirdlərə əlavə tapşırıqlar verilib problem aradan qaldırılmalıdır.
Bundan əlavə, imtahana hazırlaşan şagirdlər istədikləri müəllimin yanına hazırlığa getməkdə sərbəstdilər. Bun onların təkrarlamaları və bilikləri möhkəmləndirmələri üçün normal qarşılana bilər.
Amma ibtidai sinifdən başlayaq hazırlığı gündəlik tələbata çevirmək, bunu "bazara" çevirmək müəllim adına yaraşmayan, müəllim şəxsiyyətini alçaldan haldır. Birmənalı olaraq, bu müəllimlərin hər biri işdən azad edilməlidir. Təhsilimizdə bir sıra qanunlar, o cümlədən "Etik davranış qaydalarını" açıq aşkar pozduqlarına görə təhsildən kənarlaşdırılmalıdırlar. Bu şəxslərin müəllim adını daşıması bizim xalqımıza, şagirdlərlərimizə, müəllim adına ləkədir.
