Çində Azərbaycan dili virtual formada tədris olunur
Pekin Xarici Dillər Universitetinin (PXDU) təşəbbüsü ilə yaradılan Çin xarici dillərin kütləvi açıq onlayn tədrisi Alyansının platforması vasitəsilə Azərbaycan dili virtual formada tədris olunmağa başlanıb.
AzEdu.az xəbər verir ki, layihənin məqsədi əcnəbi dilləri və mədəniyyətləri öyrənmək istəyən çinlilərə müasir texnologiyaların imkanları sayəsində əlverişli imkan yaratmaqdır. Belə ki, internet vasitəsilə PXDU-nun xarici dillərin onlayn tədrisi platformasına daxil olan çinlilər virtual dərslər vasitəsilə müxtəlif dilləri, o cümlədən Azərbaycan dilini başlanğıc mərhələdə öyrənə biləcəklər. Bu məqsədlə Azərbaycan dili üzrə virtual dərslər platformaya yüklənib. Azərbaycan dilinin onlayn dərslərinin çəkilişləri PXDU-nun Xarici dillərin tədrisi və tədqiqi nəşriyyatında həyata keçirilib. Azərbaycan dili üzrə 12 virtual dərsi PXDU-nun Azərbaycan dili kafedrasının müdiri, layihənin rəhbəri, filologiya üzrə fəlsəfə doktoru Aqşin Əliyev tədris edib. Dərslərdə qrammatik qaydalarla yanaşı, yeni sözlər, dildə daha çox istifadə olunan söz birləşmələri öyrədilir, qısa dialoqlar, mətnlər təqdim olunur. Hər dərsin sonunda Azərbaycan mədəniyyəti, o cümlədən ədəbiyyatı, musiqisi, xalçaçılıq sənəti haqqında bilgi verilir. Redaktə işlərini isə nəşriyyatın mütəxəssisi Çen Hayçinq aparıb.
Dünyada xarici dillərin tədrisi istiqamətində öncül ali təhsil ocaqlarından olan PXDU-nun həyata keçirdiyi bu layihə Çində bir ilk olmaqla yanaşı, kütləviliyi ilə diqqət çəkir. Platformadan xarici dilləri öyrənmək istəyənlər, eləcə də xarici ölkələrin mədəniyyəti ilə tanış olmaq istəyənlər pulsuz yararlana bilərlər. Çin üzrə 1000-dən çox universitetdən 4 milyondan çox tələbə platformanın dərslərindən istifadə edib.
Qeyd edək ki, Çinin ən nüfuzlu ali təhsil ocaqlarından sayılan, 101 xarici dilin tədris olunduğu Pekin Xarici Dillər Universitetində 2016-cı ildə Azərbaycan dili kafedrası yaradılıb. İlkin mərhələdə Azərbaycan dili üçüncü dil kimi tədris olunsa da, Çin Təhsil Nazirliyinin qərarına əsasən, 2018-ci ildən ali təhsil ocağında Azərbaycan dili ixtisas kimi tədris olunur.
(Azərtac)
