Şərqşünaslıq İnstitutunda türkiyəli alimlərlə görüş olub
İyunun 12-də AMEA-nın akademik Ziya Bünyadov adına Şərqşünaslıq İnstitutunda Türkiyənin Elm, Mədəniyyət, Təhsil Vəqfinin icraçı direktoru professor Lütfi Sunarın rəhbərlik etdiyi nümayəndə heyəti ilə görüş keçirilib.
Bu barədə "tehsilmedia.info"a institutdan məlumat verilib.
Bildirilib ki, nümayəndə heyəti ilk olaraq AMEA-nın vitse-prezidenti vəzifəsini icra edən, Şərqşünaslıq İnstitutunun baş direktoru akademik Gövhər Baxşəliyeva ilə görüşüb.
Görüş zamanı akademik G.Baxşəliyeva institutda görülən işlərdən, xüsusilə türkologiya sahəsində aparılan tədqiqatlardan bəhs edib. Lütfi Sunar isə Elm, Mədəniyyət, Təhsil Vəqfinin fəaliyyəti barədə məlumat verib. Görüşdə əməkdaşlıq perspektivləri müzakirə olunub.
Daha sonra türkiyəli alimlər Şərqşünaslıq İnstitutunun kollektivi ilə görüşüblər. Lütfi Sunar Elm, Mədəniyyət, Təhsil Vəqfinin apardığı araşdırmalardan, həyata keçirdiyi layihələrdən, nəşr etdiyi elmi dərgi və kitablardan danışıb.
Şərqşünaslıq İnstitutunun şöbələrində aparılan tədqiqatlar barədə qonaqlara məlumat verilib. Sonda türkiyəli alimlər Şərqşünaslıq İnstitutunun əməkdaşlarının suallarını cavablandırıblar.
