8000-ə yaxın tələbə təhsil müəssisəsindən xaric olunub - Səbəblər sadalandı

Dövlət İmtahan Mərkəzindən təqdim olunan statistikaya görə 2022-ci ilin göstəricilərinə görə 8000-ə yaxın tələbə təhsil müəssisələrindən xaric edilib.

Ötən il təhsil müəssisəsindən xaric edilən tələbələrin sayı 7855 olub. Onlardan 4280-i bakalavriat, 946-sı magistratura, 1409-u tam orta, 1220-si isə ümumi orta ixtisas bazası üzrə təhsil alan tələbələr olub. Çıxarılmalar davamiyyət məsələsinə görə və könüllü şəkildə olub.

Təxminən 8000-ə yaxın tələbənin təhsilinin yarımçıq qalması bir çoxlarımızı narahat etməli və səbəbləri araşdırılmalıdır. Belə, az hesab olunmayacaq dərəcədə böyük rəqəmin yaranmasına səbəb olan amillər nələrdir?



Səbəbləri öyrənmək və digər suallarımıza cavab tapmaq məqsədilə təhsil eksperti Elşən Qafarova müraciət etdik.


tehsilmedia.info xəbər verir ki, azedu.az-a açıqlama verən ekspert qeyd etdi ki, ölkədə ali və orta ixtisas təhsili müəssisələrində təhsil alan 265 mindən artıq tələbə var:

“Təhsil müəssisəsindən azad olunan 8000-ə yaxın tələbənin təqribən 4-5 fazini təşkil edir”.

Onun sözlərinə görə, universitetdən xaric olunan tələbələrin təhsili müxtəlif səbəblərdən yarımçıq qalıb:

“Kimisi illik təhsilhaqqını ödəyə bilməyib. Bəziləri şəxsi həyatla bağlı məsələlərdən dolayı uzaqlaşıb. Elə tələbələr də var ki, ailə quraraq təhsillərini yarımçıq qoyublar.

Bir qisminin də dərslərə davamiyyəti xeyli axsayıb. Ən çox ödənişli təhsil alanlar imtina edirlər. Düşünürəm ki, 8 min tələbənin əksər hissəsi illik təhsilhaqqını ödəyə bilməyəndir.

Yerdə qalanlar isə ailə məsələləri, şəxsi həyatla bağlı olaraq təhsilini yarımçıq qoyanlardır. Bütün bu səbəblər fərdi qaydada araşdırılmalı statistikası çıxarılmalıdır. Ümumi say təqdim olunub. Lakin neçə tələbənin hansı səbəbdən çıxması tam məlum deyil”.