BANM-in komandası tələbələrin Nobel yarışının yarımfinalına seçilib - FOTO
SOCAR-ın Bakı Ali Neft Məktəbinin "FeelFiber” komandası tələbələrin Nobel yarışı adlandırılan "Hult Prize”ın yarımfinal mərhələsinə keçib.
BANM-dən "tehsilmedia.info"a bildirilib ki, komandanın üzvləri Kimya mühəndisliyi ixtisasının IV kurs tələbələri Aydan Quliyeva, Bənövşə Məmmədzadə və Cavidan Zeynalovdur. Yarışa ümumilikdə 200 mindən çox tələbə müraciət edib. BANM tələbələrinin komandası növbəti tura seçilən 700 komandadan biri olub.
Onlar iyun ayının 23-25-də Portuqaliyanın Lissabon şəhərində keçiriləcək yarımfinal mərhələsində final üçün mübarizə aparacaqlar.
Komandanın elmi məsləhətçisi Ali Məktəbin Kimya mühəndisliyi kafedrasının müdiri Amir Reza Vaxşuri, laboratoriya işlərində əsas dəstəkçisi isə baş laborant İnci Mirzəzadədir.
Tələbələr üçün Nobel mükafatı hesab olunan "Hult Prize” hər il keçirilən və müxtəlif ölkələrdən komandaların layihələrini təqdim etdiyi qlobal yarışdır. Yarışın qalibinə 1 milyon dollar dəyərində mükafat təqdim edilir.
