Azərbaycanlı botaniklər çinli həmkarları ilə əməkdaşlıq edəcəklər

Çin Elmlər Akademiyasının Kunminq Botanika İnstitutunun direktoru professor Sun Hanq, Herbariumun kuratoru professor Deng Tao, Çin Elmlər Akademiyasının Kunminq bölməsinin direktoru Zhou Jie, Çin Botanika İnstitutunun Administrasiyasının rəhbəri Zhu Veidong Elm və Təhsil Nazirliyi Botanika İnstitutunda olublar.

Bu barədə "tehsilmedia.info"a Botanika İnstitutundan məlumat verilib.

Bildirilib ki, səfərin məqsədi Botanika İnstitutu ilə əməkdaşlıq memorandumunun imzalanması və müştərək layihələrin müzakirəsi olub.

Görüşdə Botanika İnstitutunun baş direktoru professor Səyyarə İbadullayeva institutun elmi-tədqiqat istiqamətləri, beynəlxalq əlaqələri, həyata keçirilən layihələr, gələcək hədəfləri barədə ətraflı bəhs edib və əməkdaşlıq əlaqələrinin qurulması perspektivləri geniş müzakirə olunub.

Təqdim olunan ətraflı məlumata görə minnətdarlığını ifadə edən professor Sun Hanq institutun fəaliyyətini yüksək qiymətləndirərək elmi tədqiqat sahəsində ikitərəfli əlaqələrin qurulmasının mümkünlüyünü vurğulayıb.

Görüş birgə əməkdaşlıq münasibətlərinin inkişaf perspektivləri, kadr və təcrübə mübadiləsi, qarşılıqlı maraq doğuran digər məsələlərin müzakirəsi ilə davam edib. Qonaqlara S.İbadullayeva tərəfindən Azərbaycanın “Qırmızı Kitabı”nın III nəşri və simvolik hədiyyələr təqdim edilib.

Alimlər İnstitutun Algotekasında və Herbari Fondunda saxlanılan yerli və xarici floraya aid herbari nümunələrinin saxlanılma şəraiti və herbarilərin Avropa Məlumat Bazasına daxil edilməsi üzrə aparılan işlərlə tanış olublar.

Görüş çərçivəsində Çin Elmlər Akademiyasının Kunminq Botanika İnstitutu və Botanika İnstitutu arasında əməkdaşlıq memorandumu imzalanıb. Memoranduma əsasən bitki və göbələk müxtəlifliyinin birgə tədqiqi, hər iki ölkə ərazisinin florasında tapılan eyni bitki növlərin tədqiqi, bitki nümunələrinin mübadiləsi, molekulyar genetik analizlərin aparılması, müştərək layihələrin təşkili, kadrların təcrübə mübadiləsi və s. həyata keçirilməsi nəzərdə tutulub.