Məleykə Abbaszadə SIGMA proqramının eksperti ilə görüşüb - FOTO
Dövlət İmtahan Mərkəzinin Direktorlar Şurasının sədri Məleykə Abbaszadə SIGMA proqramının eksperti ilə görüşüb.
Bu barədə "tehsilmedia.info" a DİM-dən məlumat verilib.
Bildirilib ki, görüşdə Direktorlar Şurasının sədrinin müşaviri Məhəbbət Əkbərli, Hüquqi təminat, insan resursları və dövlət qulluğu departamentinin müdiri Nərminə Bayramova, Psixoloji qiymətləndirmə və diaqnostika şöbəsinin müdiri Pərviz Kazımov, Daxili audit xidmətinin müdiri Elmar Abasov və müvafiq şöbələrin əməkdaşları da iştirak ediblər.
Görüşün əsas məqsədi ötən illərdə həyata keçirilən əməkdaşlıq istiqamətlərində görülmüş işlərin nəticələrini müzakirə etmək, qurumun gələcəkdə daxili nəzarət və risklərin idarəedilməsi sahəsində həyata keçirməyi planlaşdırdığı fəaliyyət istiqamətlərinə əsasən yeni əməkdaşlıq sahələrini müəyyənləşdirmək və bu sahələr üzrə yeni layihənin icrasına başlamaqdır. Görüşdə Məleykə Abbaszadə DİM-in ölkəmizdə ilk yaranan publik hüquqi şəxslərdən biri olduğunu və fəaliyyət göstərdiyi müddət ərzində üzərinə düşən vəzifələri uğurla həyata keçirdiyini bildirib. Eyni zamanda publik hüquqi şəxs olan qurumlarda daxili nəzarət mexanizmlərinin mövcudluğunun önəmini və risklərin idarəedilməsinin olduqca mühüm olduğunu, buna görə də bu istiqamətdə beynəlxalq əməkdaşlığı davam etdirərək prosesi düzgün və səmərəli qurmaq, uğurla davam etdirmək üçün qabaqcıl beynəlxalq təcrübənin, müvafiq alətlərin və metodologiyanın öyrənilməsinin vacibliyini vurğulayıb. Beynəlxalq ekspert Alastir Svarbrik maraq doğuran məsələlərlə bağlı fikir və mülahizələrini görüş iştirakçıları ilə bölüşüb. DİM-in struktur bölmələrinin rəhbərləri də risklərin idarəolunması və digər sahələrdə mövcud vəziyyət barəsində fikir və təkliflərini bildiriblər. Müzakirələr nəticəsində yaxın zamanlarda DİM-in struktur bölmələrinin rəhbərləri üçün daxili nəzarətin təkmilləşdirilməsi və risklərin idarə olunması üzrə SIGMA proqramının ekspertləri tərəfindən təlimlərin keçirilməsi qərara alınıb.
Xatırladaq ki, Dövlət İmtahan Mərkəzi Avropa İttifaqı və İqtisadi Əməkdaşlıq və İnkişaf Təşkilatı ilə birgə SIGMA (Rəhbərlik və İdarəetmədə Təkmilləşdirməyə Dəstək) proqramı çərçivəsində ötən illərdə proqramın ekspertləri və təcrübəli mütəxəssisləri tərəfindən “Dövlət idarəçiliyində səmərəli nəzarət mexanizmi” istiqamətində pilot layihə icra edib. Layihənin əsas məqsədi dövlət qurumlarında daxili nəzarət mexanizmlərinin təkmilləşdirilməsi olub və pilot qurumların iştirakı ilə beynəlxalq ekspertlərin iştirakı ilə təlimlər təşkil olunub.
