BDU tələbələrinə Azərbaycan Geologiya Muzeyində interaktiv dərs keçilib - FOTO
Bakı Dövlət Universitetinin (BDU) Ekologiya və torpaqşünaslıq fakültəsinin III kurs tələbələrinə Ekologiya və Təbii Sərvətlər Nazirliyinin Azərbaycan Geologiya Muzeyində "Ekoloji kartoqrafiya və coğrafi informasiya sistemləri" fənni üzrə interaktiv dərs keçilib.
Bu barədə "tehsilmedia.info" a BDU-dan bildirilib.
Dərs zamanı BDU-nun Coğrafi ekologiya kafedrasının dosenti Lalə Bayramova mineral ehtiyatların aşkar edilməsi, onların hasilatı və iqtisadiyyatda tətbiqi barədə ətraflı məlumat verib. Dərsdə ölkənin mürəkkəb geoloji quruluşu, müxtəlif eralara və dövrlərə aid faydalı qazıntı, potensial xammal yataqlarının perspektivləri, təbiət-istehsalat münasibətlərinin iqtisadi rentabelliyi ilə yanaşı, təbii müvazinətin qorunmasının aspektləri təhlil edilib, tələbələrin sualları cavablandırılıb.
Sonra tələbələr muzeydəki eksponatlarla tanış olublar.
