Rəsədxananın Gənc Alim və Mütəxəssislər Şurasının növbəti iclası keçirilib
Yanvar ayının 12-də N.Tusi adına Şamaxı Astrofizika Rəsədxanasının (ŞAR) Gənc Alim və Mütəxəssislər Şurasının (GAMŞ) növbəti iclası keçirilib.
Bu barədə "tehsilmedia.info"a rəsədxanadan bildirilib.
Tədbiri ŞAR-ın Gənc Alim və Mütəxəssislər Şurasının sədri Aynurə Həsənova açaraq, gündəlikdə duran məsələlər barədə şura üzvlərinə məlumat verib.
İclasda öncə ötən ilin yekunlarına dair GAMŞ sədrinin hesabat çıxışı dinlənilib. Aynurə Həsənova çıxış zamanı 2023-cü ildə gənclərin elmi və elmi-təşkilati fəaliyyətinin statistikasını təqdim edib.
Sonra şura üzvlərinə 2024-cü ilin fəaliyyət planı təqdim olunub və fəaliyyət planı üzrə nəzərdə tutulan tədbirlərin təşkili məsələləri müzakirə edilib. Fəaliyyət planı çərçivəsində ŞAR GAMŞ-ın mütəmadi astroseminar yığıncaqlarının yarımillik cədvəli də təsdiq edilib.
Sonda bir sıra cari məsələlər, o cümlədən gənclərin elmi və elmi-təşkilati fəaliyyətinin daha səmərəli təşkili ilə bağlı təkliflər dinlənilib və həmin təkliflər ətrafında müzakirələr aparılıb.
