Fotoqraf Aydın Mehdiyev: “Yaşıl dünya naminə həmrəylik ili”nə həsr olunan sərgi açmağı planlaşdırıram

Abşeron Milli Parkında açdığım fotosərgini “Məni sağaldan təbiət rəngləri” adlandırıram. Doğrudan da təbiət insanı mənəvi cəhətdən müalicə edir. Təəssüf ki, çoxları bunu duymur. Məsləhət görərdim ki, bir dəfə də olsa stress anında təbiət qoynunda necə sakitləşə biləcəklərini yoxlasınlar.

Bunu jurnalistlərə müsahibəsində Azərbaycan Fotoqraflar Birliyinin təmsilçisi, tanınmış fotoqraf Aydın Mehdiyev deyib.

Ölkənin müxtəlif bölgələrində, hətta azad edilmiş ərazilərdə lentə aldığı fotoların olduğunu deyən fotoqraf fikirlərinə belə davam edib: “Çəkdiyim fotolar zamanı qlobal iqlim dəyişikliyinin təbiətə təsiri də gözümdən qaçmır. Məsələn, Balakən-Zaqatala bölgəsində biomüxtəliflik əvvəllər daha çox zəngin idi. Hazırda eyni rəngarəngliyə rast gələ bilmirəm. Çox təəssüf ki, şəkillər çəkərkən obyektivə ətrafa tullanmış plastik butulka, sellofan torbalar düşür. Sonra həmin şəkilləri fotoşopla təmizləməyə məcbur oluram. Bu, vətəndaşların təbiətə etinasız yanaşmasının göstəricisidir”.

Bu ilin “Yaşıl dünya naminə həmrəylik ili” elan olduğunu xatırladan fotoqraf bununla bağlı xüsusi sərgi hazırlayacağını da bildirib: “Bu ilə həsr edəcəyim fotolar çəkəcəm. Ordubad şəhərində, Şuşa, Laçın, Cəbrayılda və digər azad edilmiş ərazilərdə, o cümlədən gözəl təbiəti olan müxtəlif bölgələrdə çəkiliş aparacam və sərgidə nümayiş etdirəcəyəm. Sərgidə azad edilmiş ərazilərlə bağlı müqayisəli şəkillər, yəni işğaldan azad olunan zaman və hazırkı vəziyyət arasında fərqi göstərən fotolar da yer alacaq”.