BANM FISO Olimpiadasının seçim turunun mükafatlandırma tədbirinə ev sahibliyi edib - FOTO
SOCAR-ın Bakı Ali Neft Məktəbində (BANM) FISO Olimpiadasının riyaziyyat və ingilis dilləri üzrə Azərbaycan seçim turunun iştirakçılarının mükafatlandırılma mərasimi keçirilib.
BANM-dən bildirilib ki, Azərbaycanın müxtəlif bölgələrindən şagirdlərin iştirak etdikləri tədbirdə “Global Olympiad Center”in (GOC) direktoru Xəyal İbrahimzadə tədbirin mükafatlandırma ilə yanaşı, gələcəyin parlaq ulduzlarını təbrik etmək və onlara dəstək olmaq baxımından da əhəmiyyətini vurğulayıb.
Bakı Ali Neft Məktəbinin rektoru Elmar Qasımov rəhbərlik etdiyi ali təhsil müəssisəsinin belə əhəmiyyətli tədbirin ev sahibi olmasından məmnunluğunu ifadə edərək şagirdləri təbrik edib və onlara FISO-nun final mərhələsində uğurlar arzulayıb. Şagirdlərin səylərini yüksək qiymətləndirən rektor bu yarışda göstərdikləri bacarıq və həvəs ilə nümunə olduqlarını bildirib.
Tədbir şagirdlərin müxtəlif kateqoriyalarda əldə etdikləri medallarla mükafatlandırılması ilə davam etdirilib.
Qeyd edək ki, FISO Olimpiadasının final mərhələsi bu il Birləşmiş Ərəb Əmirliklərinin Dubay şəhərində keçiriləcək. İyunun 22-26-da təşkil olunacaq bu nüfuzlu tədbirdə 36 ölkədən gələn iştirakçılar bilik və bacarıqlarını nümayiş etdirəcəklər.
