Abituriyent hansı səbəbdən universitetə qəbul imtahanında iştirak edə bilmir? - ŞİKAYƏT

Qızı ilə birlikdə Füzuli rayonunun Bala Bəhmənli kəndində məcburi köçkün kimi yaşayan şəxs tehsilmedia.info-a müraciət edib. O bildirib ki, qızı Əhmədbəyli kəndində 5 ildir ki, təhsil alır. Hazırda həmin məktəbin 11-ci sinif şagirdidir. Lakin şəxsiyyət vəsiqəsi olmadığından təhsilini tamamlaya bilmir və Ali təhsil alması üçün qeydiyyatdan keçə bilmir.

 

Onun sözlərinə görə, qızı Rusiyada anadan olub. Rusiyadan gələrkən doğum şəhadətnaməsi əsasında Rusiyanın xarici pasportunu alıb və özüylə birgə Azərbaycana gətirib. Həmin pasportun vaxtı 2020-ci ildə bitib. "2015-ci ildə qızıma Azərbaycan Respublikasının şəxsiyyət vəsiqəsi və 2015-ci ildə Azərbaycan Respublikasının xarici pasportu verilib. Həmin pasportun vaxtı 2020-ci ildə bitdiyinə görə ona yenidən Azərbaycan Respublikasının xarici pasportu verilib. Hazırda həmin pasport qüvvədədir və 2025-ci ilə qədər etibarlıdır. Qızıma verilmiş AR şəxsiyyət vəsiqəsinin vaxtı 2022-ci ildə bitdiyinə görə dəyişdirilməsi üçün 2022-ci ilin oktyabr ayında Asan xidmət mərkəzinə təqdim etdik. Lakin indiyə qədər yeni vəsiqəni ala bilmirik. Vəsiqəni ala bilmədiyimizə görə DİM qızımı qeydiyyata almadı".

Bu məsələ ilə bağlı aidiyyatı qurumlara müraciət olunub. Ümid edirik ki, bu problem tezliklə həll olunacaq.