Sığınacağa yerləşdirilən uşaqlar: Təhsil, adaptasiya və psixoloji dəstək prosesi

Bu gün uşaq sığınacağında hər yaş qrupuna aid azyaşlılar var və bu, hər bir uşağa fərqli yanaşma tələb edir. Burada qalan uşaqların ailə travması, düşüncə tərzi və xasiyyəti fərqli olduğundan, onlara uyğun şəkildə işləmək çox vacibdir.

Maraqlıdır ki, sığınacağa yerləşdirilən azyaşlıların psixoloji vəziyyəti və düşdükləri mühitə uyğunlaşma müddəti nə qədərdir?

Mövzu ilə bağlı AzEdu.az-a açıqlama verən Azərbaycan Uşaqlar İctimai Birliyinin sədri və Uşaq Sığınacağı-Reinteqrasiya Mərkəzinin təsisçisi Kəmalə Ağazadə bildirib ki, sığınacaqlarda böyük bir ailə olaraq, hər bir uşaq diqqət və qayğı ilə əhatə olunur:“Azərbaycan Uşaqlar İctimai Birliyinə zorakılığa məruz qalmış uşaqlar, əsasən polis və ya Sosial Xidmətlər Agentliyi tərəfindən həssas qrup kimi qeydiyyata alındıqda, sığınacağa yerləşdirilir. Bu qrupda azyaşlı uşaqlar da yer alır. Onların yaşadığı mühit və ailə dəyərləri nəzərə alınaraq, hər biri üçün fərdi reabilitasiya planı hazırlanır”.

Müsahibimiz vurğulayıb ki, uşaqlar sığınacağa daxil olduqda, psixoloji vəziyyətləri istər-istəməz gərgin olur:

"Çünki onların əvvəlki yaşadığı mühit və rastlaşdıqları problemlər, şahid olduqları cinayətlər uşaqların psixologiyasını ciddi şəkildə pozur. Bu səbəbdən, onlar burada təhlükədə olduğunu düşünür və qorxu yaşayırlar.

Sığınacağa yerləşdirilən uşaqların yaş aralığı 0-18-dir. Onların adaptasiya dövrü isə adətən 7-10 gün arasında olur. Kiçik yaşlı uşaqlar daha sürətli uyğunlaşır. 0-3 yaş aralığındakı uşaqları isə mümkün olduğunda dövlətin körpələr evinə yönləndirməyə çalışırıq. Lakin, bəzi istisna hallarda 4-5 aylıq uşaqların da sığınacağa yerləşdirilməsi baş verir.

Sığınacağa yerləşdirilən uşaqlar arasında cinsi və fiziki zorakılığa məruz qalanların adaptasiya müddəti daha uzun olur. Lakin burada qalan hər bir uşaq diqqət və qayğı ilə əhatə olunur. Həmçinin, burada qalan hər bir uşağın sənədinin olub-olmamasından asılı olmayaraq, təhsilə cəlb olunması təmin edilir".