BDU-da informasiya mədəniyyətinin biblioqrafik fəaliyyətə təsirinə dair araşdırmalar aparılır

Bakı Dövlət Universitetinin (BDU) İnformasiya və sənəd menecmenti fakültəsində Tələbə Elmi Cəmiyyətinin (TEC) təşkilatçılığı ilə “İnformasiya mədəniyyəti və biblioqrafik fəaliyyət” mövzusunda elmi seminar keçirilib. Elmi seminarda BDU-nun Sənəd menecmenti kafedrasının magistrantı Musa Ələkbərov mövzu üzrə məruzə edib.

BDU-dan TƏHSİL.BİZ -ə bildirilib ki, gənc tədqiqatçı əvvəlcə informasiya mədəniyyəti anlayışını şərh edib, onun təkamülü və müasir paradiqmaları barədə danışıb. İnformasiya mədəniyyətinin cəmiyyətə təsiri, xüsusilə təhsil prosesindəki rolu barədə məlumatları diqqətə çatdırıb: “İnformasiya cəmiyyətinə keçid ümumi mədəniyyətin tərkib hissəsi kimi yeni bir kateqoriyanın - informasiya mədəniyyətinin aktuallığını zəruri edir. İnformasiya mədəniyyəti məlumatın əldə edilməsi, emalı və ötürülməsi kimi geniş spektrli prosesləri əhatə edir. Bu baxımdan problemin biblioqrafik fəaliyyət kontekstindən tədqiqi mühüm əhəmiyyət daşıyır”.

Araşdırmada informasiya mədəniyyətinin komponentləri kimi məntiqi mədəniyyət, semiotik mədəniyyət, ünsiyyət mədəniyyəti, şəbəkə mədəniyyəti və s. kimi anlayışlara aydınlıq gətirilib. Biblioqrafik fəaliyyət sferasında informasiya mədəniyyətinin mahiyyəti və əsas komponentləri izah edilib. Məruzədə, həmçinin informasiya texnologiyalarının informasiya mədəniyyətinin inkişafına təsirindən, rəqəmsallaşma və süni intellektin biblioqrafik fəaliyyət sahəsinə gətirdiyi yeniliklərdən bəhs olunub.

Elmi seminar müzakirələrlə davam edib.