Əlyazmalar İnstitutunun yeni nəşrləri təqdim olunub
AMEA-nın Məhəmməd Füzuli adına Əlyazmalar İnstitutunun Türk dünyası əlyazmalarının tədqiqi və Türkdilli əlyazmaların tədqiqi şöbələrinin birgə təşkilatçılığı ilə hər iki şöbənin əməkdaşlarının son iki il ərzində işıq üzü görmüş nəşrlərinin təqdimat mərasimi keçirilib.
Bu barədə "tehsilmedia.info"a institutdan bildirilib
Tədbiri giriş nitqi ilə Türk dünyası əlyazmalarının tədqiqi şöbəsinin müdiri, fil.e.d., dosent Aygül Hacıyeva və Türkdilli əlyazmaların tədqiqi şöbəsinin müdiri, fil.ü.f.d., dosent Lamiyə Rəhimova açaraq nəşrləri hələ 2020-2021-ci illərdə nəzərdə tutulmuş, lakin pandemiya ilə əlaqədar sonradan işıq üzü görmüş kitabların müəlliflərinin əməyindən, onların bu nəşrləri ərsəyə gətirmək üçün çətin şəraitdə apardıqları tədqiqat işlərindən bəhs edib, bu baxımdan tədbirin keçirilməsinin nə qədər vacib və zəruri olduğunu xüsusi vurğulayıblar.
Daha sonra çıxış üçün söz son üç il ərzində kitabları nəşr olunan müəlliflərə verilib.
Türkdilli əlyazmaların tədqiqi şöbəsinin əməkdaşları – “Qəhrəmannamə dastanı” kitabının müəllifi, fil.ü.f.d., dosent Aybəniz Rəhimova, “Ərəb ölkələrinin tarixi (orta əsrlər və yeni dövr)” kitabının müəllifi, tarix ü.f.d., dosent Aynur Hacıqədirli, “Qarabağlı Pirməhəmmədin mənaqibnaməsi” və “Əlaəddin Sabit Bosnəvinin “Ədhəm və Hüma” məsnəvisi” kitablarının müəllifi, fil.ü.f.d. Şəhla Xəlilli, “Атилла Джорма: Тюркоязычная печать на Балканах” kitabının müəllifi, elmi işçi Səadət Mürşüdova və Türk dünyası əlyazmalarının tədqiqi şöbəsinin əməkdaşları – “Qəşəm xan və Gülüstan xanım” və “Hatəm Tayi: yazılı dastan abidəsi” kitablarının müəllifi, fil.ü.f.d., dosent Əli Əliyev, “Şeyx Fəridəddin Əttar və Azərbaycan ədəbiyyatı” kitabının müəllifi, fil.ü.f.d., dosent Nəzakət Məmmədli, “Əbdüssəlam Axundzadə irsindən: “Cəhalət dərdinin dərmanı” və “Vəz və nəsihət” kitabının müəllifi, böyük elmi işçi Sevinc Rəhnulla çıxışlarında ərsəyə gətirdikləri kitabların mövzusu, mahiyyəti, məzmunu haqqında ətraflı məlumat verib, bu cür tədbirin keçirilməsi təşəbbüsünə görə təşkilatçılara təşəkkürlərini bildiriblər.
Təqdimat mərasimi kitablar haqqında əlavə çıxışların dinlənilməsi ilə davam edib.
İnstitutun Əlyazmaların və əski çap kitablarının tərcüməsi şöbəsinin baş elmi işçisi, f.ü.e.d., dosent Zəkiyyə Əbilova elmi redaktoru olduğu “Əbdüssəlam Axundzadə irsindən: “Cəhalət dərdinin dərmanı” və “Vəz və nəsihət” kitabı haqqında fikirlərini bölüşüb.
İnstitutun elmi katibi, fil.ü.f.d., dosent Əzizağa Nəcəfzadə çıxışında bu kimi nəşrləri ərsəyə gətirməklə Əlyazmalar İnstitutunun və ümumiyyətlə ölkəmizin elm sahəsinə dəyərli töhfələr verən alimlərin əməyini vurğulayıb, müəssisədə məhsuldar tədqiqat mühiti yaradıldığı üçün baş direktor, akademik Teymur Kərimlinin simasında institutun rəhbərliyinə və tədbirin təşkilatçı heyətinə dərin minnətdarlığını bildirib.
Sonda Türk dünyası əlyazmalarının tədqiqi şöbəsinin müdiri, fil.e.d., dosent Aygül Hacıyeva tədbir iştirakçılarına və tədbirin ərsəyə gəlməsində əməyi keçən hər kəsə təşəkkürünü bildirib.
