ADA Universitetində keçirilən Yay düşərgəsinə qəbul davam edir
ADA Universiteti ənənəvi olaraq bu il də Yay düşərgəsinə qəbul elan edib.
Universitetdən "tehsilmedia.info”a bildirilib ki, iyun və iyul aylarında fərqli mövzular üzrə keçirilən Düşərgədə 9-15 yaş arası şagirdlər iştirak edirlər. Onlar təhsil almaqla yanaşı, yay tətillərini həm maarifləndirici, həm də əyləncəli keçirirlər. İştirakçılar öz bilik və bacarıqlarını inkişaf etdirir və ADA mühiti ilə daha yaxından tanış olurlar.
Düşərgənin əvvəlki illərində iştirak edən Fərəh İsrafilzadə proqramla bağlı öz fikirlərini bizimlə bölüşüb. O bildirib ki, ADA Universitetində təşkil edilən Yay düşərgəsi onun ADA-dakı təhsil həyatının başlanğıcı olub və o düşərgədə iştirak etdikdən sonra ADA-da təhsil almağı qarşısına məqsəd qoyub.
“Mənim ADA ilə ilk tanışlığım ADA Universitetinin Yay düşərgəsi ilə başlayıb. Düşərgədə iştirak mənə ADA Universitetinin yüksək səviyyəli təhsili ilə yanaşı, ideal akademik mühiti, peşəkar müəllimləri və mülayim işçi heyəti ilə də yaxından tanış olmaq imkanı verib. Proqramın sonunda təhsilimi artıq ADA-da davam etdirmək istədiyimdən əmin idim. Məhz bu səbəbdən də ADA Məktəbinə təhsil almaq üçün müraciət etdim və qeyd edim ki, Yay düşərgəsində qazandığım bilik və təcrübələr burada təhsil aldığım dövrdə çox işimə yaradı.
ADA Məktəbindən məzun oldum, lakin ADA-nı tərk etməyə hazır deyildim. Buna görə də hazırda ADA Universitetinin tələbəsiyəm. Yay düşərgəsi vasitəsilə ADA mühitini öncədən tanımağım ADA-da olan təhsil həyatımın hər bir yeni mərhələsinə qısa zaman ərzində öyrəşməyimə fayda verir.
Qeyd edim ki, bu Yay düşərgəsi təkcə bilik və bacarıqlarımın inkişafında deyil, şəxsi, təhsil və karyera həyatımda da istiqamətverici və əvəzolunmaz bir təcrübə oldu. Vaxtilə şagird kimi iştirak etdiyim Yay düşərgəsində hazırda könüllü olaraq fəaliyyət göstərirəm və proqramda iştirak edən şagirdlərlə öz təcrübəmi bölüşürəm”, - deyə Fərəh İsrafilzadə bildirib.
Xatırladaq ki, bu il səkkizincisi keçirilən Yay düşərgəsinə sənəd qəbulu 31 may tarixinədək davam edir. Düşərgədə iştirak etmək istəyənlər https://bit.ly/42LkBMH linki vasitəsilə ətraflı məlumat əldə edə bilərlər.
Ötənilki Yay düşərgəsinin yaddaqalan məqamlarını əks etdirən videonu bu yutub (https://youtu.be/RseLG_DS9Jc) kanalı vasitəsilə izləmək mümkündür.
