MİQ imtahanları birbaşa universitetlərdə keçirilsin - TƏKLİF

"Müəllimlərin işə qəbul imtahanlarının ali təhsil müəssisələrində keçirilməsi daha məqsədəuyğun addım hesab olunardı".

Tehsilmedia.com bildirir ki, bu fikri redaktor.az-a təhsil eksperti Məzahir Məmmədli səsləndirdi.

Ekspert qeyd etdi ki, bu istiqamətdə hələ iki il bundan əvvəl İctimai Televiziyada gedən bir müzakirədə də eyni məzmunlu fikir səsləndirib:

“Hesab edirəm ki, MİQ imtahanlarının birbaşa ali təhsil müəssisələrində keçirilməsi çox yaxşı və yerində addım olardı. Əslində, ali təhsil müəssisələrindən bir vaxtlar əmək bazarına birbaşa, yəni ya təyinatla, ya da dövlət imtahanı vermək yolu ilə diplom alan hər şəxs əmək bazarında özünə yer tapa bilirdi. Məsələ burasındadır ki, bu təşəbbüs imkan verəcək ki, müəllimlər ali təhsil müəssisəsini bitirdikdən sonra əlavə olaraq repetitor yanına gedib MİQ imtahanlarına hazırlaşmasınlar".

Müsahibimiz qeyd etdi ki, MİQ imtahanları birbaşa universitetlərdə keçirilə və həmin şəxs ya təyinat ala, ya da artıq əmək bazarı üçün hazır kadr kimi təklif oluna bilər.



"Bütün hallarda MİQ imtahanlarının universitetlərdə keçirilməsi çox yaxşı təklifdir. Bu yanaşmanın daha geniş ictimaiyyətə təqdim olunması və qəbul etdirilməsi baxımından fayda var”, - deyə müsahibimiz yekunlaşdırdı.