BDU-da yaz imtahan sessiyası uğurla davam edir

İyunun 5-dən etibarən Bakı Dövlət Universitetində (BDU) 2022-2023-cü tədris ilinin yaz semestrinin imtahan sessiyası başlayıb. Sessiya iyulun 5-dək davam edəcək.

BDU-dan "tehsilmedia.info"a bildirilib ki, imtahanlar iki növbədə (bakalavriatura səviyyəsi üzrə saat 10:00-13:00-dək, magistratura səviyyəsi üzrə saat 14:00-18:00-dək) keçirilir.

İyunun 12-də bakalavriatura səviyyəsində 274 qrup üzrə 3500, magistratura səviyyəsində 95 ixtisaslaşmada 330 tələbə imtahan verib.

Sessiyanın gedişinə operativ nəzarət, tələbələrin biliyinin qiymətləndirilməsində şəffaflığı təmin etmək məqsədilə İmtahan Qərargahı və Apelyasiya Komissiyası yaradılıb. Komissiya sessiya müddətində imtahanların gedişi ilə əlaqədar ərizə, təklif və Elm və Təhsil Nazirliyinin "Qaynar xətt"i vasitəsilə daxil olmuş şikayətlərin araşdırılmasını təmin edir.