ATU ilə Biləsuvar Bağça-Məktəb-Lisey Kompleksi arasında əməkdaşlıq memorandumu imzalanıb
Bu gün Azərbaycan Tibb Universiteti ilə Milli Qəhrəman Mübariz İbrahimov adına Biləsuvar Bağça-Məktəb-Lisey Kompleksi arasında əməkdaşlıq memorandumu imzalanıb.
Universitetdən "tehsilmedia.info"a verilən məlumata görə, imzalanma mərasimi zamanı Biləsuvar Təhsil kompleksinin icraçı direktoru Aqşin Bağırov çıxış edərək kompleksin yaranma tarixi və fəaliyyəti haqqında ətraflı məlumat verib. A.Bağırov 18 oktyabr 2010-cu ildən fəaliyyət göstərən bu kompleksin əsas hədəfinin şagirdlərin şəxsiyyətini və yaradıcı potensialını inkişaf etdirməsi, müstəqil həyata hazır intellektuallar yetişdirmək, milli və bəşəri dəyərlər və liderlik keyfiyyətlərini təlqin etməkdən ibarətdir.
A.Bağırov qeyd edib ki, Biləsuvar Bağça-Məktəb-Lisey Kompleksi Dövlət İmtahan mərkəzinin rəsmi statistik təhlillərində son 5 il ərzində ali məktəblərə qəbul göstəricisinə görə ölkə üzrə ardıcıl olaraq birinci yeri tutur: "Yüksək bal toplayan məzunlarımız arasında ATU-nu seçib qəbul olanları çoxdur. Şagirdlərimiz tibb təhsili ilə çox maraqlandırlqarına görə, əməkdaşlıq qurmaq və məktəblilərimizin ATU- dakı ixtisaslar barəsində məlumatlandırılmasını arzulayırıq”.
Görüş zamanı ATU-nun rektoru, professor Gəray Gəraybəyli Biləsuvar Bağça-Məktəb-Lisey Kompleksi ilə faydalı əməkdaşlığın olacağından əminliyini bildirib. Rektor G.Gəraybəyli son illər ATU-da aparılan islahatlar, tədris prosesindəki yeniliklər, yeni ixtisasların açılması haqqında məlumatı görüş iştirakçılarının diqqətinə çatdırıb:
"Kompleks şagirdlərinin ATU-dakı təhsil prosesi, qurulan tədris sistemi ilə tanış etməyə çox şad olarıq. Şagirdləri universitetimizin Anatomiya Muzeyi, treninq mərkəzləri və s. ilə yanaşı, həm də tələbələrin sosial həyatı ilə də tanış edəcəyik. Çünki müasir dövrdə tələbələrin peşəkar kadr kimi yetişməsi ilə yanaşı, həm də ictimai baxımdan aktiv olmasına böyük ehtiyac var”.
Rektor Mübariz İbrahimov adına Biləsuvar Bağça-Məktəb-Lisey Kompleksinin rəhbərliyini ATU-da Ulu Öndər Heydər Əliyevin 100 illik yubileyinə həsr olunmuş tədbirə dəvət edib.
Sonra çıxış edən ATU-nun tədris və müalicə işləri üzrə prorektoru, professor Sabir Əliyev qonaqlara universitetin Hərbi tibb fakültəsi haqqında məlumat verib. Milli qəhrəman M.İbrahimovun adını daşıyan lisey şagirdlərində bu fakültəyə qarşı daha çox marağın olduğu da vurğulanıb.
Görüşün sonunda tərəflər arasında əməkdaşlığa dair memorandum imzalanıb. Görüşdə Ülvi Həzizadə İcraçı direktorun assistenti, ATU-nun Təlim-tərbiyə işləri üzrə prorektoru, dosent Zülfüqar Musabəyov, I müalicə-profilaktika fakültəsinin dekanı, dosent Elşad Novruzov, II müalicə-profilaktika fakültəsinin dekanı, dosent İsrail Məhərrəmbəyli, Əczaçılıq fakültəsinin dekanı, dosent Fərəh
Mədətli, İctimai səhiyyə fakültəsinin dekanı Qalina Qəniyeva, stomatologiya fakültəsinin dekanı Səid Əhmədov, ATU-nun Kimya kafedrasının müdiri Rəvan Məmmədov, Biologiya kafedrasının müdiri Vəfa Xankişiyeva, Kimya müəllimi Vüsalə Pənahova, Mətbuat xidmətinin rəhbəri Günel Aslanova, Tələbə Həmkarlar Komitəsinin sədri Qoşqar İsmayılov iştirak ediblər.
