BDU-da nanohissəciklərin canlı orqanizmlərə daxil olması və bioakkumulyasiyası mexanizmləri tədqiq edilir

Bakı Dövlət Universitetində (BDU) nanohissəciklərin canlı orqanizmlərə daxil olması və bioakkumulyasiyası mexanizmləri tədqiq olunur.

Bu barədə "tehsilmedia.info" a BDU-dan bildirilib.

BDU-nun Biofizika və biokimya kafedrasının müdiri professor Rövşən Xəlilov, Zoologiya və fiziologiya kafedrasının dosenti Çingiz Məmmədov və Biofizika və biokimya kafedrasının doktorantı Aysel Hacıyevanın həmmüəllifi olduqları “Akvakultura şəraitində yetişdirilən adi çəkinin (Cyprinus carpio Linnaeus, 1758) bağırsaqlarında dəmir nanohissəciklərinin toplanmasının ultrastruktur xüsusiyyətləri) (“Ultrastructural characteristics of the accumulation of iron nanoparticles in the intestine of Cyprinus carpio (Linnaeus, 1758) under aquaculture”) adlı məqalə həmin elmi araşdırmalara həsr edilib.

Nanotexnologiyaların inkişaf etdiyi dövrdə tərkibi nanohissəciklərdən ibarət olan bir çox maddələrin istehsalı müxtəlif nanozərrəciklərin ətraf mühitə, o cümlədən də su ekosisteminə düşməsinə gətirib çıxarır. Tədqiqat işinin əsas məqsədi akvakultura şəraitində yetişdirilən adi çəkinin (Cyprinus carpio Linnaeus, 1758) nazik bağırsağına Fe3O4 nanohissəciklərinin daxil olması və bioakkumulyasiyasının, həmçinin baş verən patomorfoloji dəyişikliklərin işıq və elektron mikroskopik üsulların köməyilə ultrastruktur xüsusiyyətlərinin öyrənilməsidir.

Məqalə “Web of Science” elmmetrik bazasına daxil olan (IF:6.8) “Ecotoxicology and environmental safety” jurnalında dərc olunub.