Milli Məclisin Elm və təhsil komitəsinin növbəti iclası keçirilib - FOTO
Aprelin 8-də Milli Məclisin Elm və təhsil komitəsinin videokonfrans formatında növbəti iclası keçirilib.
Parlamentin Mətbuat və ictimaiyyətlə əlaqələr şöbəsindən bildirilib ki, iclası açan komitə sədri Bəxtiyar Əliyev gündəliyə ikinci oxunuşda olan iki qanun layihəsinin - “Təhsil haqqında” qanunda dəyişiklik edilməsi barədə və “Şəhid adının əbədiləşdirilməsi və şəhid ailələrinə edilən güzəştlər haqqında”, “Çernobıl qəzasının ləğvində iştirak etmiş və həmin qəza nəticəsində zərər çəkmiş vətəndaşların statusu və sosial müdafiəsi haqqında”, “Veteranlar haqqında”, “Qaçqınların və məcburi köçkünlərin (ölkə daxilində köçürülmüş şəxslərin) statusu haqqında”, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında”, “Peşə təhsili haqqında” və “Əlilliyi olan şəxslərin hüquqları haqqında” qanunlarda dəyişiklik edilməsi barədə qanun layihələri daxil edildiyini bildirib.
Qanun layihələri barədə geniş məlumat verən komitə sədri irəli sürülən dəyişikliklərin Prezident İlham Əliyevin əhalinin aztəminatlı təbəqəsi və sosial müdafiəyə xüsusi ehtiyacı olan şəxslərin təhsilə əlçatanlığını təmin etməklə yanaşı bu kateqoriya üzrə insanların əhatə dairəsinin də genişləndirilməsinə zəmin yaradacağını diqqətə çatdırıb.
Qeyd olunub ki, Təhsil Tələbə Krediti Fondunun vəsaiti hesabına təhsil tələbə kreditlərinin verilməsi, peşə təhsili müəssisələrində yeni maliyyələşmə mexanizminin tətbiq edilməsi, habelə ali təhsil müəssisələrində dövlət hesabına maliyyələşən təqaüd yerlərinin sayının və həcminin ilbəil artırılması, həmçinin digər islahatlar dövlət başçısının təhsilə, insan kapitalının inkişafına, xüsusən də sosial müdafiəyə ehtiyac duyan həssas əhali qrupuna aid vətəndaşlara yüksək diqqətinin təzahürüdür.
Bəxtiyar Əliyev bildirib ki, müzakirəyə təqdim edilən qanun layihələrinə dair birinci oxunuşdan sonra komitəyə heç bir irad və təklif daxil olmayıb.
Məsələlərin müzakirəsində komitə sədrinin müavini Musa Qasımlı, komitənin üzvləri Ceyhun Məmmədov, Etibar Əliyev və Milli Məclis Aparatının Sosial qanunvericilik şöbəsinin müdiri Adil Vəliyev çıxış edərək, qanun layihələri ilə bağlı fikirlərini bildiriblər.
Müzakirələrin sonunda hər iki qanun layihəsi ikinci oxunuşda baxılması üçün Milli Məclisin plenar iclasına tövsiyə olunub.
