Pedaqoji Universitetin qəbul planı 97 faiz dolub
Azərbaycan Dövlət Pedaqoji Universitetində (ADPU) 2026/2027-ci tədris ili üçün bakalavriat səviyyəsi üzrə ixtisas seçiminin birinci məhrələsində yüksək nəticələr qeydə alınıb. Universitet və beş filial üzrə ayırılmış ümumilikdə 3605 plan yerindən 3491-i dolub. ADPU şəbəkəsi üzrə qəbul planının icrası 96,84 faiz təşkil edib.
Pedaqoji Universitetin 2570 plan yerinə 2491 nəfər qəbul olunub və plan 96,93 faiz dolub. Filiallar üzrə isə 1035 plan yerindən 1000-i dolub (96,62 faiz).
Quba və Cəlilabad filiallarında qəbul planı 100 faiz, Ağcabədi filialında isə 99,11 faiz yerinə yetirilib. Universitetdəki 45 proqramdan 40-da və filiallardakı 43 proqramdan 40-da bütün plan yerləri tamamilə dolub.
2026-cı ildə ADPU-da dövlət sifarişi üzrə qəbul göstəricisində də atım dinamikası qeydə alınıb. Dövlət sifarişi əsasında qəbul olunanların sayı 2025-ci ildəki 1528 nəfərdən 1547 nəfərə yüksəlib. Dövlət sifarişinin ümumi qəbulda payı isə 56,68 faizdən 62,10 faizə çatıb.
ADPU üzrə orta bal 384,63, median bal isə 402,6 bal təşkil edir. ADPU şəbəkəsi üzrə 9 nəfər 600-dən yüksək balla tələbə adını qazanıb və onların hamısı dövlət sifarişi üzrə qəbul olunub. ADPU şəbəkəsi üzrə ən yüksək nəticə isə 649,4 bal olub.
2026-cı ildə Pedaqoji Universitetdə ilk dəfə qəbul aparılan Riyaziyyat və fizika müəllimliyi ixtisasına ayrılmış 15 yer tam dolub. İxtisas üzrə keçid balı 431,6, dövlət sifarişi üzrə keçid balı 475, maksimum nəticə isə 637,1 bal olub.
Filiallarda yeni açılan ixtisaslar üzrə də yüksək qəbul göstəriciləri qeydə alınıb. Quba və Cəlilabad filiallarında Aqronomluq ixtisaslarının hər birinə ayrılmış 20 plan yeri, eyni zamanda Şəki filialında Turizm işinin təşkili ixtisası üzrə ayrılmış 30 plan yerinin hamısı dolub.
ADPU şəbəkəsində dövlət sifarişi üzrə keçid balı 500 və daha yüksək olan 14 ixtisas qeydə alınıb. Ən yüksək dövlət sifarişi keçid balı Şəki filialının Xarici dil müəllimliyi (ingilis dili üzrə) ixtisasında 614 bal təşkil edib.
Qəbul olunanların 2054 nəfəri, yaxud 82,46 faizi 300 və daha yüksək, 1258 nəfəri, yaxud 50,5 faizi 400 və daha yüksək, 288 nəfəri, yaxud 11,56 faizi isə 500 və daha yüksək bal toplayıb.
2025-ci illə müqayisədə universitet üzrə 300 və daha yüksək bal toplayanların ümumi qəbulda payı yüksəlib.
