Seysmoloji Xidmət Mərkəzində seysmik stansiya rəhbərlərinin iştirakı ilə iclas keçirilib

AMEA-nın nəzdində Respublika Seysmoloji Xidmət Mərkəzində (RSXM) seysmik stansiya rəhbərləri və əməkdaşlarının iştirakı ilə iclas keçirilib.

Bu barədə "tehsilmedia.info" a RSXM-dən bildirilib.

RSXM-nin direktoru AMEA-nın müxbir üzvü Qurban Yetirmişli bildirib ki, iclasın keçirilməsində əsas məqsəd 2023-cü il ərzində seysmik stansiyalar tərəfindən görülmüş işlərin müzakirə olunması, eləcə də stansiyaların əməkdaşlarının cihaz və avadanlıqların iş prinspi ilə bağlı texniki məlumatlandırılmasına dair treninqin keçirilməsidir.

2023-cü ildə Azərbaycan ərazisində baş verən zəlzələlər haqqında danışan direktor bildirib ki, seysmik stansiyalar “real vaxt” rejimində işlədiyinə görə stansiyalar tərəfindən qeydə alınan məlumatlar birbaşa Zəlzələlərin tədqiqatı bürosuna ötürülür və bundan sonra emala yönəldilir.

Qurban Yetirmişli, həmçinin iş prosesində ortaya çıxa biləcək hər hansı texniki problemlərin qarşısının alınması üçün əvvəlcədən zəruri tədbirlərin görülməsinin vacibliyini vurğulayıb və Azərbaycan seysmoloqlarının qarşısında duran vəzifələr haqqında da danışıb.

Mərkəzin Qarabağda da seysmik tədqiqatlara başlayacağını qeyd edən direktor Şuşa seysmik stansiyasının quraşdırılması istiqamətində texniki işlərin davam etdirildiyni vurğulayıb.

İclasda RSXM-nin baş mühəndisi Ramiz İskəndərov seysmik stansiyalarda görülmüş texniki işlər, aparılmış tikinti-təmir işləri haqqında məlumat verib. Həmçinin Zəlzələlərin tədqiqatı bürosunun rəisi, Yer elmləri üzrə fəlsəfə doktoru Səidə İsmayılova və seysmik stansiya rəhbərləri çıxış edərək görülmüş işlərlə bağlı fikir və təkliflərini bildiriblər.

Qeyd edək ki, seysmik stansiyalarn rəhbərləri və əməkdaşları üçün keçirilən treninq dekabrın 22-də başa çatacaq.