Nüfuzlu jurnalda BMU və amerikalı alimlərin əsasını qoyduğu nəzəriyyədən bəhs edilib
“Springer” nəşriyyatında çap olunan yüksək impakt faktorlu “Annals of Operations Research” jurnalında (İmpakt Faktoru 4.4) Bakı Mühəndislik Universitetinin (BMU) elm və innovasiya məsələləri üzrə prorektoru, AMEA-nın müxbir üzvü, texnika elmləri doktoru, professor Ağası Məlikovun amerikalı alimlərlə birgə əsasını qoyduğu elmi nəzəriyyəyə ayrıca yer ayrılıb.
Bildirilib ki, jurnalın xüsusi buraxılışının ön söz məqaləsində “Queueing-inventory: analytical and simulation modeling and classical and retrial queues and inventory” (https://link.springer.com/article/10.1007/s10479-024-06015-3) qeyd olunub ki, xidmət-ehtiyatlanma nəzəriyyəsinin əsasları 30 il əvvəl bir-birindən asılı olmayaraq Ağası Məlikov və amerikalı alimlər Karl Sigman və David Simchy-Levi tərəfindən qoyulub. Son 30 ildə bu nəzəriyyə əməliyyatların tədqiqi elminin xüsusi və boyük sürətlə inkişaf edən sahəsinə çevrilib. Nəzəriyyənin əsas tətbiq sahələri kimi logistik sistemlər, o cümlədən təchizat zənciri şəbəkələri, ticarət sistemləri, ehtiyatların idarə edilməsi, kompüter-kommunikasiya sistemləri və s. göstərilə bilər.
Qeyd edək ki, adıçəkilən jurnalın 331-ci cildinin 2-ci nömrəsi (https://link.springer.com/journal/10479/volumes-and-issues/331-2) kütləvi xidmət-ehtiyatlanma nəzəriyyəsinin yaranmasının 30 illiyinə həsr edilib. Xüsusi nömrə üçün daxil olan 46 məqalədən yalnız 24-ü ciddi resenziyalardan keçərək jurnalda işıq üzü görüb. Jurnalın dəvət olunmuş redaktorları BMU-nun elm və innovasiya məsələləri üzrə prorektoru Ağası Məlikov, Achyutha Krishnamoorthy (Hindistan), Srinivas Chakravarthy (ABŞ) və Viswanath Narayanandır (Hindistan).
