MEK tərəfindən “Zərifə Əliyeva - 100” adlı elektron layihə istifadəyə verilib
Azərbaycan Milli Elmlər Akademiyası (AMEA) Mərkəzi Elmi Kitabxanası (MEK) tərəfindən ərsəyə gələn "Zərifə Əliyeva - 100” adlı elektron layihəsinin təqdimatı keçirilib.
Bu barədə "tehsilmedia.info"a MEK-dən məlumat verilib.
Təqdimat mərasimində çıxış edən MEK-in baş direktoru professor Məmməd Əliyev bildirib ki, 2023-cü ilin aprel ayında görkəmli alim, Əməkdar elm xadimi, tibb elmləri doktoru, akademik Zərifə Əliyevanın anadan olmasının 100 ili tamam olur.
"Yubileyini qeyd etdiyimiz akademik Zərifə Əliyeva zəngin mənəviyyata sahib mənalı ömür yolu keçib, əhatəli elmi fəaliyyəti ilə ölkəmizdə tibb sahəsinin, xüsusilə oftalmologiyanın inkişafına əhəmiyyətli töhfələr vermiş mənəvi və insani keyfiyyətləri ilə Azərbaycan qadınının nümunəvi obrazını özündə ehtiva edir. Akademik Zərifə Əliyevanın ömür yolu qazanılan uğurlarla zəngindir. Oftalmologiyanın inkişafına verdiyi böyük töhfəyə görə Zərifə Əliyeva bu sahədə ən yüksək mükafata – SSRİ Tibb Elmləri Akademiyasının akademiki M.İ.Averbax adına mükafatına layiq görülən ilk qadındır. O, respublikada yüksəkixtisaslı kadrların hazırlanması işinə gərgin əmək sərf edib, gənc alimlərin, oftalmoloqların böyük bir nəslini formalaşdırıb. Ümummilli Lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı, bu gün dünya liderləri arasında tanınan möhtərəm Prezidentimizin anası Zərifə xanım Əliyeva xalqımız tərəfindən hər zaman ehtiramla yad olunacaq, onun xalq qarşısında, Azərbaycan səhiyyəsi qarşısında misilsiz xidmətləri daim minnətdarlıq hissi ilə qeyd ediləcək. Prezident İlham Əliyevin "Akademik Zərifə Əliyevanın 100 illik yubileyinin qeyd edilməsi haqqında” Sərəncamına əsasən ölkədə silsilə tədbirlər keçirilir.
Mərkəzi Elmi Kitabxananın "Zərifə Əliyeva - 100” adlı elektron layihəsi artıq oxucuların istifadəsinə verilib. Bundan əlavə, tezliklə Zərifə Əliyeva biblioqrafiyası da oxuculara təqdim olunacaq”,- deyə baş direktor diqqətə çatdırıb.
Məmməd Əliyev vurğulayıb ki, kitabxanada görkəmli alimin zəngin və çoxşaxəli həyat və fəaliyyətini əks etdirən nəşrlərdən ibarət sərgi də təşkil olunub.
MEK-in Avtomatlaşdırma və proqram təminatı şöbəsinin müdiri Natavan Hacıyeva təqdimatı keçirilən elektron baza haqqında ətraflı məlumat verib. Bildirilib ki, 6 bölmədən ibarət elektron resursda materiallar PDF formatında təqdim edilib. Burada görkəmli oftalmoloqun elmi və ictimai fəaliyyətini əks etdirən yazılar, öz əsərləri, haqqında yazılan əsərlər, eləcə də nailiyyətləri təqdim edilib. Həmçinin elektron resursda dövri mətbuat materialları - 1960-cı ildən başlayaraq respublika və keçmiş SSRİ-nin qəzet və jurnallarında dərc olunan və akademik Zərifə Əliyevanın elmi nailiyyətlərini əks etdirən minə yaxın analitik yazı xronoloji ardıcıllıqla verilib. Elektron resursun Fotoqalereya bölməsində görkəmli akademikin şəkillərdən ibarət videomaterial yerləşdirilib. "Zərifə Əliyeva - 100” adlı elektron layihə alimlərin, magistr və tələbələrin, eləcə də geniş oxucu kütləsinin müraciət edəcəyi elmi mənbə olacaq.
