"Uşaqların günahı nədir?.." - ŞİKAYƏT
"Kəngərli rayonunun Şahtaxtı kəndindəki orta məktəbdə yeni dərs ili ingilis dili müəllimi olmadan başlayıb. Valideynlərin sözlərinə görə, dərslərin başlanmasından günlər keçməsinə baxmayaraq, 524 şagirdin təhsil aldığı məktəbdə problemin həlli üçün tədbir görülmür.
Valideynlərdən Bünyad Musayev vacib xarici dil dərslərinin keçirilməməsinin övladlarının gələcək təhsilinə mənfi təsir göstərəcəyindən narahatdır:
“524 şagirdin oxuduğu məktəbdə ingilis dili əsas xarici dil kimi nəzərdə tutulub, amma bu fənni tədris edəcək müəllim yoxdur. Xarici dil uşaqlarımızın gələcək təhsili üçün çox vacibdir. Müəllim yoxdursa, onlar bu fənni necə və kimdən öyrənməlidirlər? Uşaqların günahı nədir? Onların digər məktəblərin şagirdlərindən geri qalmasına niyə imkan verilir?”
Adının açıqlanmasını istəməyən digər valideyn isə problemin dərs ili başlamazdan əvvəl həll edilməli olduğunu bildirir.
Onun sözlərinə görə, müəllim çatışmazlığına baxmayaraq, vaxtında vakansiya elan edilməyib:
“Biz istəyirik ki, uşaqlarımız digər məktəblərdə təhsil alan şagirdlərdən geri qalmasınlar. İngilis dili məktəbdə əsas xarici dildirsə, müəllim də təmin edilməlidir. Müəllim çatışmırdısa, aidiyyəti qurumlar dərs ili başlamazdan əvvəl tədbir görməli və vakansiya elan etməli idilər. Hələ də problemlə maraqlanan və açıqlama verən yoxdur. Akademik Zərifə Əliyevanın adını daşıyan, 500-dən çox şagirdin oxuduğu məktəb nədənsə diqqətdən kənarda qalıb”.
Valideynlər aidiyyəti qurumlara müraciət edərək müəllim çatışmazlığının aradan qaldırılmasını və məktəbdə ingilis dilinin tədrisinə başlanmasını istəyirlər."
