Tələbələrin DİQQƏTİNƏ - Universitetdən qovulmaq üçün bunlardan biri kifayətdir

Ali təhsil müəssisəsində təhsil alan tələbələrin bir sıra hallarda universitetdən xaric edilməsi mümkündür.

Tehsilmedia.org xəbər verir ki, bu, “Təhsil haqqında” Azərbaycan Respublikasının Qanununa və müvafiq qanunvericilikdə müəyyən edilmiş qaydalara əsasən həyata keçirilir.

Belə ki, tələbə aşağıdakı hallarda ali təhsil müəssisəsindən xaric edilir:

- öz arzusu ilə;

- ali təhsil müəssisəsini dəyişdikdə;

- ali təhsil müəssisəsinin daxili nizam-intizam qaydalarını kobud şəkildə və ya dəfələrlə pozduqda. Buraya 3 ay davamlı olaraq dərslərdə iştirak etməmək və bu müddətdə ali təhsil müəssisəsi ilə əlaqə saxlamamaq da daxildir;

- səhhətinə görə - həkim-məsləhət və ya hərbi-həkim komissiyasının arayışına və ya qərarına əsasən;

- növbəti tədris ilinə qeydiyyatdan keçmədikdə və həmin tədris ilinin payız semestrinin sonuna qədər ali təhsil müəssisəsi ilə əlaqə saxlamadıqda;

- əcnəbi və ya vətəndaşlığı olmayan şəxsə müvəqqəti yaşamaq üçün icazə verilmədikdə, həmin icazənin müddəti uzadılmadıqda və ya icazə ləğv edildikdə;

- əcnəbi və ya vətəndaşlığı olmayan şəxs Azərbaycan Respublikasının təhsil müəssisəsinə əyani təhsilalma formasında qəbulunun rəsmiləşdirildiyi tarixdən 90 gün müddətində Azərbaycanda yaşamaq üçün icazənin verildiyini təsdiq edən sənədin surətini təhsil müəssisəsinə təqdim etmədikdə;

- yekun dövlət attestasiyasından keçmədikdə və ya təqvim ilinin sonuna qədər yekun dövlət attestasiyasında iştirak etmədikdə.

Qeyd edək ki, “Hərbi vəzifə və hərbi xidmət haqqında” Azərbaycan Respublikasının Qanununa əsasən ali təhsil müəssisəsindən xaric edilmiş Azərbaycan vətəndaşı 6 ay müddətində ali təhsil müəssisəsinə bərpa olunmadıqda müddətli həqiqi hərbi xidmətə çağırışa möhlət hüququnu itirir və ümumi əsaslarla müddətli həqiqi hərbi xidmətə çağırılır. Möhlət hüququnu itirmiş şəxslər barədə rəsmi məlumat 7 iş günü müddətində ali təhsil müəssisəsi tərəfindən tələbənin hərbi qeydiyyatda olduğu dövlət qurumuna təqdim edilir.

Ali təhsil müəssisəsindən xaric edilmiş şəxsə “Təhsil haqqında” Qanunun 27.3-cü maddəsinə uyğun olaraq müvafiq arayış və şəxsi işində saxlanılan təhsil haqqında dövlət sənədinin əsli (olduğu halda) verilir. Həmin sənədin surəti və xaric olunma haqqında əmrdən çıxarış isə ali təhsil müəssisəsində tələbənin şəxsi işində saxlanılır.

Xüsusi təyinatlı ali təhsil müəssisəsinin tələbəsinin həmin müəssisədən xaric olunması isə həmin müəssisənin nizamnaməsində nəzərdə tutulan əsaslarla həyata keçirilir.

azedu.az