Ödənişsiz süni intellekt təhsilinə qeydiyyat başlayıb

İnnovasiya və Rəqəmsal İnkişaf Agentliyinin “Rəqəmsal İstedadlar” layihəsi çərçivəsində “Code Academy” ilə birgə həyata keçirilən 3 dərəcəli “ Süni intellekt əsaslı təhsil proqramı”na qeydiyyat başlayıb.

Tehsilmedia.org xəbər verir ki, 405 nəfər bu imkandan yararlana biləcək.

Hazırda hər 3 dərəcə üzrə qeydiyyat açıqdır:

I dərəcə təhsil modeli – Süni intellekt savadlılığı

Bu tədris modeli süni intellekt üzrə baza bilikləri qazandırır, Sİ alətlərindən gündəlik fəaliyyətdə və tədrisdə düzgün istifadə bacarıqlarını formalaşdırır.

II dərəcə təhsil modeli – Praktiki İKT bacarıqları

Bu tədris modeli süni intellekt əsaslı proqramlaşdırma, kibertəhlükəsizlik və data analitikası üzrə praktiki bacarıqların inkişafını və əmək bazarına hazırlığı təmin edir.

III dərəcə təhsil modeli – İxtisaslaşmış təlim proqramları

Bu tədris modeli DevOps, zərərli proqramların təhlili və risklərin idarə edilməsi üzrə ixtisaslaşmış bilik və praktiki bacarıqları dərinləşdirir.

Təlim formatı: Yalnız regionlar üçün nəzərdə tutulan “Süni İntellekt biliyi əsasları” qruplarında təlimlər onlayn keçiriləcək. Digər proqramlarda təlimlər oflayn formatda təşkil olunacaq.

I dərəcə təhsil modeli: “Müəllimlər üçün süni intellekt” proqramı üçün müəllimlik və ya pedaqoji fəaliyyət təcrübəsi tələb olunur. Digər I dərəcə proqramları üçün ön şərt yoxdur.

II dərəcə təhsil modeli: İKT, riyaziyyat və mühəndislik ixtisasları üzrə sonuncu kurs tələbələri və məzunları üçün nəzərdə tutulub.

III dərəcə təhsil modeli : Müvafiq İKT sahəsində minimum 1 il iş təcrübəsi və ya uyğun peşəkar sertifikat tələb olunur.

Son müraciət tarixi: 11 oktyabr