"Şagird riyazi biliklərdən real həyatda istifadə etməyi bacarmalıdır" - Emin Əmrullayev

“Ölkənin əsas irəliləyişlərindən biri oxu və riyazi savadlılıq istiqamətində müşahidə olunur”.

Tehsilmedia.com xəbər verir ki, bunu elm və təhsil naziri Emin Əmrullayev PISA 2025 – Şagird Qiymətləndirilməsi üzrə Beynəlxalq Proqramın nəticələrinin təqdimatı zamanı dedi.

Nazir bildirdi ki, Azərbaycanın ən böyük irəliləyişi oxu savadlılığı istiqamətində qeydə alınıb:

“Çünki söhbət yalnız Azərbaycan dilində oxumaqdan getmir. Oxu savadlılığı həm də oxuduğunu düzgün anlamaq, o cümlədən riyazi və digər məzmunlu mətnləri dərk etmək bacarığıdır”.

Emin Əmrullayev riyazi savadlılığın PISA-nın konseptual çərçivəsində yalnız riyazi düsturları bilməklə məhdudlaşmadığını diqqətə çatdırdı.

Onun sözlərinə görə, riyazi savadlılıq həm düsturlarla işləməyi, həm də əldə olunan bilikləri gündəlik həyatda tətbiq etməyi əhatə edir:

“PISA-nın konseptual çərçivəsinə əsasən, riyazi savadlılıq yalnız düsturları bilmək deyil. Buraya riyazi biliklərdən istifadə etmək, onları real həyatda tətbiq etmək və gündəlik qarşılaşdığımız məsələlərin həllində riyazi yanaşmalardan yararlanmaq da daxildir. Məsələn, faiz hesablamaları riyazi savadlılığın gündəlik həyatda tətbiqinə nümunədir. Şagird riyazi anlayışları bilməklə yanaşı, həmin biliklərdən real situasiyalarda istifadə etməyi də bacarmalıdır”.

Nazir qeyd etdi ki, Azərbaycan PISA qiymətləndirməsində əvvəlki illərdə də iştirak edib:

“Azərbaycan 2018-ci ildə PISA-da iştirak edib. 2022-ci ildə də Azərbaycan şagirdləri qiymətləndirməyə cəlb olunublar. Həmin dövrlərdə əsasən Bakı məktəblərinin şagirdləri iştirak edirdi və qiymətləndirmə kompüter əsaslı şəkildə həyata keçirilirdi.

2025-ci ildə isə PISA qiymətləndirməsinin əhatə dairəsi daha da genişlənib. 2026-cı ildə PISA artıq bütün ölkənin təhsil sistemini əhatə edəcək”.