"2545 şagird risk qrupuna daxil edilib" - Şok Statistika

"4-cü siniflərdə 2545 şagird risk qrupuna daxil edilib".

Tehsilmedia.com xəbər verir ki, bunu Azərbaycan Respublikasının Təhsil İnstitutunun direktoru səlahiyyətlərini müvəqqəti icra edən, nazirin müşaviri Elnur Əliyev çıxışı zamanı bildirib.

O qeyd edib ki, 4-cü sinif şagirdlərinin qiymətləndirilməsi zamanı ibtidai səviyyədə oxu bacarığını müəyyənləşdirmək üçün üç minimum səviyyəli sualdan istifadə olunub.

Bu suallar şagirdlərin ən sadə oxu bacarıqlarına sahib olub-olmadığını və ciddi risk qrupunda olan şagirdlərin müəyyənləşdirilməsini nəzərdə tutub.

Elnur Əliyevin sözlərinə görə, qiymətləndirmədə birinci səviyyədən aşağı nəticə göstərən 2545 şagird həmin üç sualdan ən azı ikisinə səhv cavab verib. Bu isə ümumilikdə 150 min şagirdin təxminən 1,7 faizini təşkil edir.

“Bu şagirdlərin tapılıb nəticələrinin yerlərlə, məktəblərlə paylaşılması və onlarla fərdi şəkildə işlənilməsi vacibdir. Məhz bu sualdan yox, bu tip üç sual olub ki, həmin sualların ən azı ikisinə səhv cavab verən şagirdləri ayırmışıq ki, bunlar tapılmalı və xüsusi işlənməlidir”, – deyə Elnur Əliyev bildirib.

O, 4-cü siniflərdə riyaziyyat və oxu üzrə açıq sualların tətbiqinə də diqqət çəkib.

Bildirib ki, cari ildə ilk dəfə olaraq hər iki fənn üzrə şagirdlərin cavabı özlərinin yazdığı tam açıq suallardan istifadə olunub.

Qeyd olunub ki, açıq suallarda cavablandırma faizi qapalı test tapşırıqları ilə müqayisədə daha aşağı olub. 4-cü sinif şagirdlərinin 27 faizi riyaziyyat üzrə açıq sualları cavablandırmayıb.

Oxu üzrə isə bu göstərici 19 faiz təşkil edib.
Eyni zamanda, oxu üzrə şagirdlərin 98 faizi bütün qapalı sualları cavablandırıb.

Elnur Əliyev açıq sualların yoxlanılması zamanı müşahidə olunan dil və yazı problemlərinə də toxunub. Bildirib ki, bəzi şagirdlərin cavablarında Türkiyə türkcəsində olan sözlərdən, eləcə də rus mənşəli sözlərdən istifadə halları müşahidə edilib.

Onun sözlərinə görə, şagirdlərin Azərbaycan dilində daha düzgün və səlis yazı vərdişlərinin ibtidai təhsil mərhələsindən formalaşdırılmasına xüsusi diqqət yetirilməlidir.

Bundan əlavə, 4-cü sinif şagirdlərinin açıq suallara verdiyi cavablarda hüsnxətlə bağlı müəyyən problemlərin də müşahidə olunduğu bildirilib.