Müəllimləri də motivasiya etmək lazımdır!

Müəllimləri müxtəlif tələblərlə yükləyirik. Çiyinlərindəki yükü artırırıq, sonra da müəllim adının müqəddəsliyindən danışırıq. Amma heç kim demir ki, müqəddəs olanla belə rəftar etməzlər!


Təhsil şagirdyönümlüdür deyə şagirdlərin intellekt və öyrənmə tərzləri nəzərə alınır. Şagirdləri motivasiya etmək üçün müəllimləri müxtəlif fəaliyyətlərdən istifadə etməyə səsləyirik. Öyrənmə modelləri, iş üsulları, iş formaları, layihələr, oyunlar və s istifadə edirik, differensial yanaşırıq.

Bəs həmin şagirdlərə dərs keçən, tərbiyə verən müəllimlər necə?
Həmin müəllimlərin canla-başla, həvəslə, qürur və sevinclə dərs keçməsi, adaptasiya olunması üçün nələr edirlər?
Ancaq yeniliklərlə bağlı təlimlər keçirilir, bir çox sənəd işləri və tələblər mövcuddur. Bir çox şeyi alırlar, amma əvəzində nə verirlər?

Müəllimləri motivasiya etmək üçün heç bir tədbir görülmür. Müəllimlərin maaşından tutulmalar 14% gəlir vergisi, 3% dsmf, 2% həmkar, 2% tibbi sığorta, 0,5% işsizlərə sığorta, 1% müdafiə fondu, 1% aypara, 1% YAP...
Bir sözlə, maaşlarından narazıdırlar, həyatlarına dəstək yox, ailə qayğıları, ödənişlər, kreditlər, məktəbdə mobbinq, çəkişmə var. Amma bütün bunlara rəğmən sadəcə müəllimləri yükləyirik. Çiyinlərindəki yükü artırırıq, sonra da müəllim adının müqəddəsliyindən danışırıq. Amma heç kim demir ki, müqəddəs olanla belə rəftar etməzlər!.